Qaırat Ábdirahmanov EQYU SІM keńesiniń otyrysyna qatysady

ASTANA. QazAqparat - QR SІM Qaırat Ábdirahmanov EQYU-ǵa múshe memleketter Syrtqy ister mınıstrleriniń otyrysyna qatysady. Bul týraly QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.

«6-7 jeltoqsanda Mılan qalasynda Eýropadaǵy qaýipsizdik jáne yntymaqtastyq uıymyna múshe memleketterdiń Syrtqy ister mınıstrleri deńgeıinde 25-shi otyrysy ótedi. Atalǵan kezdesýge uıymnyń barlyq 57 Syrtqy ister mınıstrleriniń qatysýy josparlanýda. Qazaqstan delegatsııasyn Syrtqy ister mınıstri Qaırat Ábdirahmanov bastap barady,- dedi Aıbek Smadııarov.

Onyń aıtýynsha, Qazaqstan Respýblıkasynyń EQYU-men yntymaqtastyǵy uıym qyzmetiniń áskerı-saıası, ekonomıkalyq-ekologııalyq jáne adamı saladaǵy barlyq úsh ólsheminde júzege asyrylady. 2010 jylǵy 1-2 jeltoqsanda EQYU Sammıtinde qabyldanǵan «Qaýipsizdik qoǵamdastyǵy jolynda» atty Astana deklaratsııasynyń rýhyn engizý eń mańyzdy basymdyq bolyp tabylady.

«Qazaqstan Syrtqy ister mınıstri EQYU ınstıtýttarynyń basshylarymen, sondaı-aq Uıymǵa múshe memleketterdiń syrtqy ister mınıstrlerimen ekijaqty kezdesýler ótkizedi», - dedi resmı ókil.