Qaıyrymdylyq qorlary qansha salyq tólep júr

<p>ASTANA. KAZINFORM &ndash; Qarjy mınıstrliginiń Memlekettik kirister komıteti Kazinform saýalyna joldaǵan jaýapta eldegi qaıyrymdylyq qorlary bir jylda bıýdjetke qansha salyq tólegenin málim etti.</p>

- 2023 jyly qaıyrymdyq qorlary memleketke 426,1 mln teńge, tabys kózinen 6,6% kóleminde salyq tóledi, - dep jazylǵan resmı málimette. 

Alaıda bul - qaıyrymdylyq qorlarynyń búkil tabysynyń 6,6 paıyzy 426,1 mln teńge degen sóz emes. Óıtkeni, komıtet mamandarynyń túsindirýinshe, qaıyrymdylyq qorlary kommertsııalyq emes uıym bolyp esepteletindikten, qyzmetine qaraı tabysyna salynatyn salyq mólsherlemesi de árkelki.

Salyq kodeksiniń 289-babynyń 2-tarmaǵy boıynsha jeke múddesine kiris alýdy maqsat tutpaıtyn, qyzmetiniń nátıjesinde alynǵan dara kiristi nemese múlikti ózara bólip almaıtyn uıymdardyń myna sanattaǵy tabystaryna salyq salynbaıdy:

• memlekettik áleýmettik tapsyrysty iske asyrý shartynan túsken tabys;
• depozıt syıaqylary;
• uıymǵa kirý jáne múshelik jarnalary;
• kóppáterli turǵyn úıdegi páterler men turǵyn emes úı-jaılardyń ıeleri jasaǵan jarnalar;
• depozıtke ornalastyrylǵan aqshanyń syıaqysynan týyndaǵan baǵam aıyrmasy;
• óteýsiz alynǵan múlik túrindegi tabys, (qaıyrymdylyq kómek, grant, demeýshilik kómek, óteýsiz negizde alynǵan aqsha jáne basqa da múlik).

- Salyq kodeksiniń 289-babynyń 2-tarmaǵynda kórsetilmegen kommertsııalyq emes uıymdardyń tabystaryna jalpyǵa birdeı tártipte salyq salynady, - delingen jaýapta.

Aıta keteıik, qazir halyq arasynda qaıyrymdylyq qorlardyń jumysyna zańmen tyıym salynýy múmkin degen boljamdar aıtylyp júr. Memlekettik organdar muny shekteý nemese tyıym salý emes, qyzmetin jetildirý sharasy dep túsindiredi. 

Jurt ishinde osyndaı áńgime taraǵan kezde «Biz birgemiz» qory arqyly tanymal bolǵan Perızat Qaırat tasqyn saldaryn joıýǵa jınalǵan qaıyrymdylyq qarajattan 1,5 mlrd teńgeden astam aqsha jymqyrdy degen kúdikpen ustalyp, eki aıǵa qamaýǵa alyndy.