Qaıyrymdylyq qory basqarý shyǵynyn qalaı esepteýi kerek

<p>ASTANA. KAZINFORM &ndash; Qaıyrymdylyq qorlary qarjysynyń qansha paıyzyn ákimshilik-basqarýshylyq shyǵyndaryna jumsaı alady? Sondaı-aq qaıyrymdylyq uıymdary qansha ýaqytta bir óz qyzmeti jóninde esep berýi kerek? Kazinform tilshisi osy suraqtarǵa jaýap izdep kórdi.</p>

«Qaıyrymdylyq týraly» zańnyń 12-baby 2-tarmaǵyna saı, qaıyrymdylyq jasaýshylar kiristerdi:

1) bir jyldyń ishinde bir ret nemese birneshe ret qaıyrymdylyq kómekke;

2) uzaq merzimdi qaıyrymdylyq kómekke;

3) áleýmettik jarnamany ótkizýge járdemdesýge;

4) qaıyrymdylyq uıymynyń qyzmetin júzege asyrýǵa jumsaı alady.

Qaıyrymdylyq uıymdarynyń ákimshilik-basqarýshylyq shyǵyndarynyń somasy Zańmen reglamenttelmegen, ony sol uıymnyń basqarýshy organy belgileıdi.

Sondaı-aq, osy zańnyń 20-baby 5-tarmaǵynda: «Basqarýshy kompanııanyń nysanaly kapıtaldy (endaýmentti) basqarý jónindegi qyzmetti júzege asyrýǵa baılanysty ákimshilik-basqarýshylyq shyǵystary nysanaly kapıtaldyń (endaýmenttiń) jyldyq kiris somasynyń jıyrma paıyzynan aspaıdy» dep jazylǵan.

Al «Qaıyrymdylyq týraly» zańnyń 8-baby 2-tarmaǵy 3-1 bóligine saı, qaıyrymdylyq uıymdary jylyna bir retten sıretpeı oryndalǵan qaıyrymdylyq baǵdarlamasy týraly esepti buqaralyq aqparat quraldarynda nemese qaıyrymdylyq uıymynyń ınternet-resýrsynda jarııalaýǵa mindetti.

Esepte qaıyrymdylyq baǵdarlamasyn oryndaý sheńberindegi kirister men shyǵystar, qol jetkizilgen maqsattar týraly qysqasha aqparat qamtylýǵa tıis.

Sondaı-aq ÚEU, sonyń ishinde qaıyrymdylyq uıymdary jyl saıyn 31 naýryzǵa deıin óz qyzmeti týraly esepti Úkimettik emes uıymdardyń málimetter bazasyna (ÚEU MB) usynady.

Eske salsaq, eriktiler qozǵalysynyń belsendisi jáne qoǵamdyq qaıyrymdylyq qorynyń quryltaıshysy Perızat Qaırat ustalyp, oǵan qatysty tergeý júrgizilip jatyr.

Sonymen qatar Mádenıet jáne aqparat mınıstri Aıda Balaeva qaıyrymdylyq kómek mehanızmderin jetildirý qajet ekeni týraly aıtty.