Qaıyrymdy is jasar kezde jaýapkershilikti de esten shyǵarmaıyq – Aıda Balaeva

<p>ASTANA. KAZNFORM &ndash; QR Mádenıet jáne aqparat mınıstri Aıda Balaeva elimizdiń aımaqtaryndaǵy sý tasqyny jaǵdaıy men qıyndyqqa tap bolǵan azamattarǵa kómek kórsetem deýshilerge úndeý jarııalady.</p>

«Qurmetti dostar! Elimiz qazir qıyn kezeńdi bastan keship jatyr. Qarǵyn sý aýyl-aımaqty basyp, halyqtyń úı-jaıy men mal-múlkine orasan zor shyǵyn keldi. Mundaı qıyn-qystaý kezde el azamattary judyryqtaı jumylyp, bir-birine kómek qolyn sozýda. Árıne, tilsiz jaýdy aýyzdyqtaý ońaı bolmasa da, halyqtyń birligi men yntymaǵy arqyly bul synaqty da eńseremiz dep senemiz.

Osy ýaqyt ishinde bizge zardap shekkenderge kómek kórsetýge nıeti jandar habarlasyp, kóptegen ótinishter tústi. Gýmanıtarlyq kómekti qaıda jáne qalaı jiberýge bolady degen suraqtar kóp. Qarajatty qaı qorǵa jáne qandaı shotqa aýdarýǵa bolady ?

Bul rette, tek resmı aqparat kózderine senýge shaqyramyz. Resmı túrde jumys isteıtin qorlar týraly aqparatty jergilikti atqarýshy organdarǵa habarlasyp, bile alasyzdar. Qaıyrymdy is jasar kezde jaýapkershilikti de esten shyǵarmaıyq»,-dedi mınıstr.

Aıta keteıik, osy ýaqytta elimizdiń sý basqan aımaqtarynan evakýatsııalanǵan azamattar sany 100 myńǵa taıady.