«Kaıdzen» arqyly baspananyń baǵasyn 20-25 paıyzǵa arzandatýǵa bolady

ASTANA. QazAqparat - Japonııanyń bir top depýtattary osy eldiń Halyqaralyq yntymaqtastyq agenttiginiń (JICA) qoldaýymen Qazaqstanda qolǵa alynǵan jobalardy iske asyrý barysyn baqylap júr. Sonyń biri - «Kaıdzen» tájirıbesin qurylys salasyna engizý. Búgin japondyqtar atalǵan tájirıbeni Astanadaǵy qurylys nysandarynda qoldaný jaıymen tanysyp shyqty, dep xabarlaıdy QazAqparat tilshisi.

Aıta ketken jón, «kaıdzen» - bul naqty bir texnologııa emes. Ol - jumys jasaýdyń japondyq fılosofııasy. Negizgi maqsaty - óndiristik sharalardy, jalpy bıznes protsesti úzdiksiz jetildirý. Sonyń arqasynda jumysshylardyń qaýipsizdigi kúsheıedi, artyq shyǵyndar qysqarady, barlyq jumystar tez ári júıeli túrde júredi. Máselen, qurylys salasynda ýaqtyly paıdaǵa berýge, baspananyń sapasyn da aıtarlyqtaı jaqsartýǵa bolady. Al artyq shyǵyndardy qysqartýdyń nátıjesinde úıdiń baǵasyn da túsirýge múmkindik bar.

«Iá», «kaıdzen» texnologııasy arqyly jumystyń tıimdiligin barynsha arttyrýǵa bolady. Sol arqyly úıdiń óz baǵasyn túsirip qana qoımaı, sapasyn da arttyrýǵa zor múmkindik bar. Astanada ǵana emes, jalpy Qazaqstan boıynsha baspanany xalyqqa barynsha qoljetimdi etýge bolady. «Kaıdzenniń» kómegimen úıdiń baǵasyn 20-25 paıyzǵa arzandatýǵa bolady. Ol - anyq nárse. Ásirese, memlekettik baǵdarlama aıasynda salynyp jatqan turǵyn úılerdiń qurylysyna osy tájirıbeni keńinen engizgen jón. Sonda osy sanattaǵy baspananyń sapasyn kóterýge bolady», - deıdi QR Qurylysshylary odaǵynyń tóraǵasy Talǵat Erǵalıev.

Uıym basshynyń aıtýynsha, «kaıdzen» fılosofııasy adamnyń jumysqa degen kózqarasyn túbegeıli ózgertýdi kózdeıdi. Bastyqtan bastap qaraıym jumysshyǵa deıingi adamdardyń bári óz jumysyna japondar sııaqty jaýapty ári tııanaqty qarasa, qurylystyń sapasy joǵary bolady.

«Negizi, keńester kezinde mundaı fılosofııany biz ózimiz bastap bergenbiz. Biraq ony saqtaı almadyq. Japondar bolsa, atalǵan tájirıbeni óz mádenıetine beıimdep qana qoımaı, ary qaraı jetildire bildi", - dep atap kórsetti Talǵat Faızollauly.

Qazirgi kezde Japonııanyń xalyqaralyq yntymaqtastyq agenttiginiń osy baǵdarlamasyna Astanadaǵy úsh qurylys kompanııasy qatysyp jatyr. Olarǵa arnaıy kýratorlar kómektesedi. Jalpy, álemniń damyǵan memleketteri «kaıdzen» texnologııasyna jıi súıenedi.

«Biz óz tájirıbemizben Vetnammen de, Taılandpen de bólisip kelemiz. Máselen, vetnamdyqtar «kaıdzendi» tez meńgerip ketti. Al taılandtyqtarmen sál qıyndaý boldy. Sebebi olardyń jalqaýlyǵy basym», - deıdi JICA sarapshysy Hadjıme Sýdzýkı.

Hadjıme san 80 jasqa kelse de, álemdi aralap, bıznesti «kaıdzen» tájirıbesine úıretip júr. Sebebi atalǵan fılosofııany qurylys salasynda ǵana emes, kez kelgen kásipte de qoldanýǵa bolady.