Qaı óńirlerde jáne qaı organdarda bıýdjet qarajaty tolyq ıgerilmegen

NUR-SULTAN. QazAqparat – Memlekettik bıýdjettiń shyǵystary 98,8%, respýblıkalyq bıýdjettiń shyǵystary – 99,2, jergilikti bıýdjetterdiń shyǵystary 98,8% atqaryldy. Bul týraly QR Qarjy mınıstri Erulan Jamaýbaev aıtyp berdi, dep habarlaıdy QazAqparat tilshisi.

«Ótken jyldyń uqsas kezeńimen salystyrǵanda bıýdjetterdiń barlyq deńgeılerinde atqarylý kórsetkishi joǵary. Respýblıkalyq bıýdjet boıynsha somasy 5,9 trln teńgege shyǵystar júrgizildi. Atqarylmaý 49 mlrd teńgeni qurady, onyń ishinde 11 mlrd teńge únemdelgen. Al 38 mlrd teńge ıgerilmegen», - dedi Qarjy mınıstri búgingi Úkimet otyrysynda.

Igerilmeýdiń neǵurlym iri somalary Densaýlyq saqtaý, Aýyl sharýashylyǵy, Іshki ister, Qarjy, Tsıfrlyq damý, ınnovatsııalar jáne aeroǵarysh ónerkásibi mınıstrlikterinde baıqalǵan.

«Igerilmeýdiń negizgi sebepteri: tólem qujattaryn uzaq kelisý, konkýrstyq rásimderdiń uzaq ótkizilýi, oryndalǵan jumystar aktileriniń, shot-faktýralardyń ýaqytyly usynylmaýy, sharttardy uzaq maquldaý, esepti aıda qarajattyń shyǵyndalýyna qajettiliktiń bolmaýy», - dep túsindirdi E. Jamaýbaev.

Jergilikti bıýdjetterdiń shyǵystary 2,8 trln teńgeni qurady jáne 34 mlrd teńge atqarylmaǵan.

«Bıyl óńirlerge 1,9 trln teńge nysanaly transfertter kózdelgen. Olarǵa 1 maýsymǵa 646 mlrd teńge bólingen. Onyń 97,5%-i ıgerilgen. 16 mlrd teńge atqarylmaǵan, onyń ishinde 2 mlrd teńge – únemdeý, 14 mlrd teńge ıgerilmedi. Eń kóp ıgerilmeý: Almaty, Nur-Sultan, Shymkent qalalarynda jáne Batys Qazaqstan, Shyǵys Qazaqstan oblystarynda qalyptasty», - dedi Qarjy mınıstri.