Qaı óńirdiń dárigerleri eń joǵary aılyq alady

ASTANA. QazAqparat – Bir jylda elimizdiń densaýlyq saqtaý salasyna tartylǵan ınvestıtsııanyń jartysyna jýyǵy Astana qalasy men Jambyl, Shyǵys Qazaqstan oblystaryna tıesili bolǵan. Bul týraly QazAqparat Finprom.kz resýrsyna silteme jasap habarlaıdy.

«Densaýlyq saqtaý salasynda negizgi kapıtalǵa bólingen ınvestıtsııanyń kólemi qańtar-qazaq aralyǵynda 168,9 mlrd teńge boldy. Bul byltyrǵy kezeńnen 18,1% artyq.

Óńirler arasynda densaýlyq saqtaý men áleýmettik qyzmetterge bólingen ınvestıtsııanyń eń úlken bóligi Astananyń úlesine tıdi – 51,1 mlrd teńge. Sondaı-aq Jambyl (15,6 mlrd teńge) jáne Shyǵys Qazaqstan (15,3 mlrd teńge) oblastaryna jumsalǵan aqshanyń kólemi aıtarlyqtaı joǵary. Atalǵan salalarǵa eń az qarajat bólingen óńirler Atyraý (447,6 mln teńge) jáne Ulytaý (496,6 mln teńge) oblystary boldy», - dep jazady Finprom.kz.

Áleýmettik qyzmetter men densaýlyq saqtaý salasyna bólingen qarajattyń ishinde jergilikti bıýdjetter men jeke qarajattyń úlesi artqan – tıisinshe 53,7 mlrd teńge jáne 53,4 mlrd teńge. Al respýblıkalyq bıýdjetten bólingen soma – 35,1 mlrd teńge.

Bul salalardaǵy nomınaldy eńbekaqy kólemi bıyl 245,2 myń teńge bolyp otyr. Bul ortasha respýblıkalyq aılyqtan 18,2% az (299,8 myń teńge).

«Óńirler arasynda densaýlyq saqtaý jáne áleýmettik qyzmetter salasy mamandarynyń eń joǵary nomınaldy aılyǵy Astanada tirkelgen – 313,7 myń teńge. Bul saladaǵy ortasha respýblıkalyq aılyq mólsherinen 27,9% joǵary. Eń tómengi aılyq Shymkentte – 212,7 myń teńge», - dep jazylǵan saraptamada.