Qaı óńirde jylý men sýdyń tarıfi bárinen joǵary

NUR-SULTAN. QazAqparat – QR UEM Tabıǵı monopolııalardy retteý komıtetiniń tóraǵasy Asan Darbaev Qazaqstanda jylý men sý tarıfi qaı óńirde joǵary ekenin aıtyp berdi, dep habarlaıdy QazAqparat tilshisi.

«Jylýmen qamtý salasynda qyzmet qunynyń basym úlesi otynǵa baılanysty bolady. Al eger gaz týraly aıtar bolsaq, tarıf gazdyń tolyq nemese bólshektep satylatyn baǵasyna qaraı qubylady. Sýmen qamtý salasynda strategııalyq taýar – elektr energııasy. Al elektr energııasynyń baǵasy elektr energııasyn óndirý qunyna qaraı belgilenedi», - dedi Asan Darbaev OKQ-da ótken baspasóz másıhatynda.

Onyń aıtýynsha, sýmen qamtý jaǵynan eń joǵary tarıf - Mańǵystaý, Atyraý jáne Soltústik Qazaqstan oblystarynda.

«Mańǵystaý oblysynda teńiz sýy qysymmen tekserilip, hımııalyq protsesten ótedi. Bul aımaq kóterme saýda boıynsha baǵasy belgilenetin gazben qamtylady. Ony Energetıka mınıstrligi bekitedi. Búgingi tańda gazdyń eń qymbat baǵasy - Nur-Sultan, Shymkent pen Almatyda. Baǵa týraly aıtsaq, kóp jaǵdaı sol sýbektidegi tehnıkalyq jaı-kúıge, qurylǵyǵa baılanysty bolady», - dedi Asan Darbaev.

Komıtet basshysy sóz sońynda barlyq óńirde tarıf deńgeıi dáıekti ekenin jetkizdi.