Qaı óńirde apelsın qymbat – ulttyq statıstıka málimeti

ASTANA. QazAqparat – Ulttyq statıstıka bıýrosy ótken aıda el óńirlerinde apelsın, banan jáne lımon baǵasy qanshaǵa qymbattaǵanyn aıtty, dep habarlaıdy QazAqparat.

2022 jyldyń jeltoqsanynda apelsın baǵasy jyldyq mánde 30,8% qymbattap, bir kelisi úshin 1004 teńgeni qurady. Eń qymbat apelsın Astanada satylyp jatyr – bir kelisi 1 140 teńge. Sondaı-aq bul jemis ózge óńirlermen salystyrǵanda Semeı (1 139 tg/kg), Aqtaý (1 133 tg/kg) jáne Qonaev (1 117 tg/kg) qalalarynda qymbatyraq. Basqa aımaqtarda baǵa 850-1000 teńge aralyǵynda. Eń arzan apelsındi Petropavl qalasynda 811 teńgege satyp alýǵa bolady.

Tsıtrýstyń taǵy bir túri lımon bir jylda 7,4% qymbattady. Onyń ortasha baǵasy bir kelisi úshin – 1 173 teńge. Eń qymbat baǵa Atyraý oblysynda – kelisi úshin 1448 teńge, eń arzany Túrkistan oblysynda – kelisi úshin 953 teńge.

Al banan baǵasy ótken jyly 46,2% ósken. Eldegi ortasha baǵa – bir kelisine 878 teńge. Banannyń eń qymbaty Semeı qalasynyń dúken sórelerinde – 1043 tg/kg. Eń arzany Pavlodarda – 720 teńge.

Foto: belta.by