Qaı oblysta zeınetaqy jınaǵynyń bir bóligin alý ótinimderi kóbirek maquldandy

NUR-SULTAN. QazAqparat – «Otbasy bank» AQ basshysy Lázzat Ibragımova qaı oblysta zeınetaqy jınaǵynyń bir bóligin alý ótinimderi kóbirek maquldanǵanyn aıtyp berdi, dep habarlaıdy QazAqparat tilshisi.

Prezıdent janyndaǵy Ortalyq kommýnıkatsııalar qyzmetinde ótken baspasóz máslıhatynda bank basshysyna BAQ ókilinen «qaı oblysta zeınetaqy jınaǵynyń bir bóligin alý ótinimderi kóbirek maquldandy?» dep suraq qoıyldy.

«Almaty - ótinimderdi maquldaý jaǵynan jáne zeınetaqy jınaqtary boıynsha absolıýtti kóshbasshy», - dedi Lázzat Ibragımova.

Aıta ketsek, buǵan deıin «Otbasy bank» AQ basshysy zeınetaqy jınaǵy eń kóp 4 óńirdi ataǵan bolatyn.

«658 mlrd teńge! Almaty qalasyndaǵy salymshylar (zeınetaqynyń bir bóligin paıdalana alatyn azamattardyń jalpy jınaǵy) jınaǵan zeınetaqy qory osyndaı. Ekinshi orynda – Mańǵystaý oblysy. Ol óńirdiń halqynyń zeınetaqy qoryndaǵy jalpy jınaǵy 397 mlrd teńge. Úshinshi orynda – Nur-Sultan qalasy. Elordada baǵdarlamaǵa qatysa alatyn azamattardyń jalpy zeınetaqy jınaǵy 325,9 mlrd teńge (13,3 paıyz). Tórtinshi orynda – Atyraý oblysy (257,4 mlrd teńge) – 10,4 paıyz. Osy tórt óńirdiń halqy zeınetaqy jınaǵyn paıdalana alatyn azamattardyń 70 paıyzdan astamyn qurap otyr», - degen edi Lázzat Ibragımova Ortalyq kommýnıkatsııalar qyzmetinde ótken baspasóz máslıhatynda.