Qaı mınıstrlikter men ákimdikter bıýdjet qarajatyn ıgere almaı otyr

ASTANA. QazAqparat – Bıylǵy 4 aıda birneshe mınıstrlik pen ákimdik bólingen bıýdjet qarajatyn ıgere almady. Bul týraly Úkimet otyrysynda Premer-Mınıstrdiń orynbasary – Qarjy mınıstri Erulan Jamaýbaev aıtty, dep habarlaıdy QazAqparat tilshisi.

«Memlekettik bıýdjet shyǵystary - 98,6, respýblıkalyq bıýdjet shyǵystary – 99, jergilikti bıýdjet shyǵystary 98,6 paıyzǵa atqaryldy. Respýblıkalyq bıýdjet boıynsha somasy 7 trln teńgege shyǵystar júrgizildi. Atqarylmaǵan soma - 72 mlrd teńge, onyń ishinde 16 mlrd teńge - únemdelgeni. Igerilmegeni - 55 mlrd teńge», - dedi Erulan Jamaýbaev.

Onyń aıtýynsha, ıgerilmegen neǵurlym iri soma Mádenıet jáne sport, Aqparat jáne qoǵamdyq damý, Ekologııa jáne tabıǵı resýrstar, Tsıfrlyq damý, Innovatsııalar jáne aeroǵarysh ónerkásibi mınıstrlikterinde qalyptasty.

«Igerilmeýdiń negizgi sebepteri: shart jasasý rásimderin uzaq júrgizý, naqty kórsetilgen qyzmet kólemine tólem júrgizý, memlekettik satyp alý konkýrstarynyń uzaq ótkizilýi, oryndalǵan jumys aktileri men shot-faktýralardyń ýaqtyly usynylmaýy jáne basqalary», - dedi mınıstr.

Sondaı-aq bıyl 4 aıda tórt óńir 14 mlrd teńge nysanaly transfertti ıgere almady.

«Jergilikti bıýdjet shyǵystary 3,3 trln teńgeni qurady. Atqarylmaǵany - 47 mlrd teńge. Bıyl óńirlerge 2 trln teńgege jýyq nysanaly transfert kózdelgen. Olarǵa 1 mamyrǵa 473 mlrd teńge bólingen», - dedi Qarjy mınıstri.

Erulan Jamaýbaevtyń atap ótýinshe, atalǵan qarjynyń 97 paıyzy ıgerilgen.

«Igerilmegeni – 14 mlrd teńge. Eń kóp ıgerilmegen soma Astana jáne Almaty qalalarynda, Atyraý jáne Túrkistan oblystarynda qalyptasty», - dedi ol.