Qaı kezde de adam jańashyldyqqa umtylǵany durys – qyzylordalyq 57 jastaǵy stýdent
— Aldymen ózińiz jaıly aıta ketseńiz? Qaı jerde ómirge keldińiz?
— Kórshiles Ózbekstanda Navoı oblysy bar. Sol óńirde qalyń qazaq meken etken Tamdy aýdany bar. Áli de qazaqylyqty joımaǵan, salt-dástúrge beriktigimen erekshelenedi. Men sol aýdanda 1967 jyly dúnıege kelgenmin. Qazaq halqynyń maqtan eter tulǵasy Baýyrjan Momyshuly sol óńirge barǵan ýaqytynda «naǵyz qazaqtardy osy Tamdy aýylynda kórdim» dep aǵynan jarylǵan eken. Sondaı-aq belgili sazger Shámshi Qaldaıaqov «Tamdy arýy» degen án shyǵaryp, týǵan ólkemdi joǵary baǵalady.
— Sizdiń 57 jasyńyzda joǵary oqý ornynda bilim alýyńyzǵa ne sebep?
— Men jas kezimnen bilimimdi tolyqtyrýǵa qyzyǵýshylyǵym erekshe edi. Qazir de sol daǵdymnan aınyǵan joqpyn. Qolymnan kelgenshe sheberligimdi jetildirip, bilimimdi tolyqtyrýǵa kúsh salyp kelemin. Meniń oıymsha, qaı jasqa kelseń de, jańashyldyqqa umtylǵan durys. Árbir adam «Úırensem, bilsem» degen armanyna jetkeni artyq emes. Qazir zaman talaby da ózgerip barady. Bizdiń jas kezimizde oqyǵan keıbir talaptar búgingi kúnmen sáıkes kele bermeıdi.
Ózim jaıly aıtsam, 1988-1991 jyldary Tashkenttegi qurylys tehnıkýmynda oqyp shyqtym. Al 2006 jyly taý-ken jumystary mamandyǵy boıynsha joǵary oqý ornyn támamdadym. Ómir jolymnyń 12 jylyn arnaýly oqý ornynda muǵalim bolýǵa arnadym. 2004 jyly Qyzylordaǵa kóship kelgennen keıin eńbek ótilim qurylys mekemelerinde órbidi. Onda brıgadır qyzmetinen jobalyq dırektor qyzmetine kóterildim. 2013 jyly jeke mekeme ashyp, óz kásibimdi júrgizgen edim. Dese de bul jumystyń óz qıyndyǵy bar ekenin aıta keteıin. Sondyqtan ony ýaqytsha toqtata turýǵa týra kelip otyr.
— Joǵary oqý ornynda qurylys salasy mamandyǵyn tańdaýyńyzǵa ne sebep boldy?
— Birshama ýaqyt boıy syrqattanyp, eńbekten qol úzip qaldym. Syrqattan jazylyp shyqqannan keıin qurylys salasy boıynsha mamandar izdegen habarlandyrýǵa kózim tústi. Sol boıynsha túıindeme daıyndap, atalǵan mekemeniń elektrondy mekenjaıyna jibergen edim. Meniń eńbek jolymdy baǵalaǵan olar sol kúni keshke ózderine qyzmetke kelý jóninde usynysyn joldady.
Sodan beri men óndiristik mekemelerdiń qurylysyn júrgizetin «Aqmaral» JShS-de qyzmet etip kelemin. Seriktestik basshysy Jaqypjan Sadyqov — óz salasynyń bilgiri atanǵan tájirıbeli maman. Máselen, biz elimiz boıynsha ák óndirisimen aınalysatyn «Saryopan» ken ornyndaǵy ǵımarat qurylysyn merziminen buryn aıaqtadyq. Búginde Jambyl oblysynyń Shý aýdanynda elektrovoz shyǵaratyn zaýyt qurylysyn júrgizip jatyrmyz.
Sondyqtan men qurylys salasy boıynsha bilimimdi tolyqtyrýǵa sheshim qabyldadym. Aldaǵy jyly dıplom alatyn bolamyn. Jalpy, úırenseń barlyǵy basyńda qalady. Ómir jolyńda kádeńe jaraıdy. Meniń qurylys salasy mamandyǵyn tańdaýyma osyndaı jaǵdaılar sebep boldy.
— Cizdiń jas kezińizdegi jáne qazirgi ýaqyttaǵy oqýdyń qandaı aıyrmashylyǵy bar?
— Aıyrmashylyǵy jer men kókteı. Ol ýaqyttaǵy tehnologııa múldem basqasha edi. Elimiz táýelsizdik alǵannan keıin alys-jaqyndaǵy shet memleketterdiń tehnologııasy ómirimizge ene bastady. Buryn qolmen atqarylatyn keıbir jumystar qazir tehnıkanyń kúshimen jasalady. Sondyqtan zaman talabyna baǵynyp, bilimińdi jetildirip otyrǵan artyq emes dep oılaımyn. Jumys, oqý men otbasylyq ómirdi qatar alyp júrýdiń qıyndyǵy joq.
Jasyratyny joq, jasyń úlkeıgennen keıin oqý ońaıǵa soqpaıdy. Alaıda oǵan qaraýǵa bolmaıdy. Barlyq tosqaýylǵa qaramaýyń tıis. Meniń alǵa qoıǵan maqsattarym bar. Sony oryndaýǵa kúsh salamyn. Al jastarǵa aıtarym der ýaqytynda bilim alǵan jón. Oǵan búginde barlyq múmkindik bar emes pe? Internetten izdegen barlyq dúnıeń tabylady. Jalpy, úırenem degen adamǵa bir mamandyqpen shektelip qalǵan bolmaıdy. Adam balasy únemi izdeniste bolǵany jaqsy. Meniń oıymsha, ár adam óz mamandyǵyn baǵalaı bilse, úlken belesterdi baǵyndyra alady. Úzdiksiz izdený joǵary tabystarǵa jeteleıdi. Ol úshin ýaqytyńdy durys paıdalana bilgeniń jón.
— Sóz sońynda otbasyńyz jaıly aıta ketseńiz.
— Men kópbalaly ákemin, qazir olardan 3 nemere súıip otyrmyn.
— Áńgimeńizge raqmet.