Qaı qalalarda eski avtobýstar kóp ekeni begili boldy

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Kólik komıteti tóraǵasynyń orynbasary Altaı Sembekuly óńirlerde avtobýs parkterin jańartý máselesin kóterdi, dep habarlaıdy QazAqparat tilshisi.

«Qazirgi kezde qalalardaǵy avtobýs tasymalynda 10 525 kólik bar. Olardyń tozý deńgeıi 46 paıyzǵa jetti. Qaladaǵy avtobýs parkin jańartý máselesi tasymaldaýshylar shyǵyndaryn sýbsıdııalaýmen tyǵyz baılanysty. Sondyqtan tıisti deńgeıde sýbsıdııalaý somasyna qaraı tasymaldaýshylar ózderiniń parkterin jańartý múmkindigine ıe bolady», - dedi A. Sembekuly mınıstrlikte ótken keńeste.

Onyń aıtýynsha, eskirgen avtobýstardyń 50 paıyzdan astamy Aqtaý, Óskemen, Taldyqorǵan, Petropavl, Oral jáne Qostanaı qalalarynda jolaýshy tasymaldap júr.

«Sonymen qatar, jeńildikpen lızıng boıynsha qarjylandyrý baǵdarlamasy aıasynda otyndyq óndiristiń avtobýstaryn jetkizý úshin 2018-2021 jyldary respýblıkalyq bıýdjetten 79 mlrd teńgege jýyq bólindi. Osy baǵytta 2 283 avtobýs qamtamasyz etildi», - dedi vedomstvo ókili.

Budan buryn habarlanǵandaı, Altaı Sembekuly qalalarda jolaýshylar tasymaly salasynda áleýmettik mańyzdaǵy baǵdarlardy sýbsıdııalaý problemalaryn aıtty.

Sońǵy 4 jylda sýbsıdııalaý somasy bes ese ósip, 102 mlrd teńgeni qurady. Degenmen bul qarajattyń 80 paıyzǵa jýyǵy tek Nur-Sultan, Almaty, Shymkent qalalaryna ǵana tıesili boldy.

Ashy q k ó zderden alyn ǵ an foto