Qaı eldiń áýe kompanııalary Reseıge ushatyn reısterin toqtatty

<p>ASTANA. KAZINFORM - Qazaqstan, Ázerbaıjan, Izraıl, BAÁ jáne Túrikmenstannyń áýe kompanııalary Reseı ushatyn reısterin ýaqytsha toqtatty.</p>

Azerbaijan Airlines (AZAL) Reseıdiń keıbir qalalaryna reısterin toqtatty.

— 25 jeltoqsanda bolǵan Embraer 190 ushaǵynyń apatyna qatysty tergeýdiń bastapqy derekterin, sondaı-aq Mıneralnye vody, Sochı, Volgograd, Ýfa, Samara, Groznyı qalalaryna ushý qaýipsizdigin qamtamasyz etý salasyndaǵy yqtımal táýekelderdi eskere otyryp Mahachkalada 28 jeltoqsannan bastap sot isi aıaqtalǵanǵa deıin Reseı baǵytyndaǵy reıster toqtatyldy, — delingen áýe kompanııasynyń baspasóz qyzmeti taratqan habarlamada.

Turkmenistan Airlines Máskeýge ushýdy bir aıǵa toqtatty.

- Túrikmenstan áýe joldary 2024 jyldyń 30 jeltoqsany men 2025 jyldyń 31 qańtary aralyǵynda Ashhabad – Máskeý – Ashhabad baǵyty boıynsha turaqty reısterdiń toqtatylǵanyn habarlaıdy, – delingen tasymaldaýshynyń saıtynda.

Izraıldik El Al áýe kompanııasy Tel-Avıvten Máskeýge jáne keri reısterdi toqtatýdy 2025 jyldyń naýryzyna deıin uzartty. Buǵan deıin «Reseı áýe keńistigindegi oqıǵalarǵa» baılanysty bir aptaǵa toqtatylatyny týraly habarlanǵan bolatyn.

QAZAQ AIR 2025 jyldyń 28 jeltoqsany men 27 qańtary aralyǵynda Astana – Ekaterınbýrg baǵyty boıynsha reısterdi ýaqytsha toqtatqanyn habarlady.

- Reısterdi toqtata turý jolaýshylar men ekıpaj músheleriniń qaýipsizdigin qamtamasyz etý úshin Reseıge ushý táýekelderin turaqty baǵalaý nátıjeleri boıynsha júzege asyryldy. Ekaterınbýrgke reısterdi qalpyna keltirý qaıta tekserý nátıjeleri jarııalanyp, qaýipterdi baǵalaý jasalǵannan keıin júzege asyrylady, - delingen avıakompanııa habarlamasynda.

Aıta keteıik, jeltoqsannyń 25-i kúni Bakýden Groznyıǵa ushyp bara jatqan Ázerbaıjan ushaǵy Aqtaý mańynda, Qazaqstan aýmaǵyna qulady. Bortta 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza taýyp, 29 adam aman qaldy.