Qaı elder prezıdentterin sottady

ASTANA. QazAqparat - Donald Tramp qylmystyq aıyp taǵylyp otyrǵan AQSh-taǵy alǵashqy prezıdent bolyp otyr. Tramp AQSh-ta isti bolyp jatqan birinshi prezıdent desek te, basy dál osyndaı daýǵa shatylǵan ózge de el basshylary barshylyq, dep habarlaıdy QazAqparat sottalǵan el basshylary týraly sholý jasaǵan Euronews-tiń málimetine súıene otyryp.

Burynǵy memleket basshysy ári 2024 jyly ótetin prezıdent saılaýyna Respýblıkalyq partııanyń atynan úmitker bolǵaly otyrǵan ol iskerlik qujattardy qoldan jasady degen aıyptyń 34 tarmaǵy boıynsha kinásin moıyndaǵan joq.

Atalǵan aıyptaýlar Tramptyń 2016 jylǵy prezıdenttik naýqany kezinde pornoaktrısa Stormı Denıelske aýyzbastyryq retinde tólegen aqshaǵa qatysty bolyp otyr.

Axios derekterine súıensek, 2000 jyldan beri keminde 78 elde, onyń ishinde Eýropada taqtan túsken memleket basshylary túrmege toǵytylyp nemese jaýapqa tartylypty.

Horvatııada burynǵy úkimet basshysy Ivo Sanader jemqorlyq áreketi úshin aıyptalyp, 8 jylǵa bas bostandyǵynan aıyryldy. Búginde ol jazasyn ótep jatyr.

Frantsııada burynǵy eki prezıdentine aıyp taǵyldy.

Aldymen Jak Shırak sottaldy. Ol 2011 jyly jemqorlyq úshin isti bolyp, 2 jylǵa shartty jaza arqalady. Ol sondaı-aq Parıj meri bolyp turǵan kezinde qyzmet babyn jeke múddesine paıdalanǵany, senimdi asyra paıdalanǵany jáne qarajatty ońdy-soldy shashqany úshin kináli dep tanyldy.

Ekinshisi ­- Nıkolıa Sarkozı. Onyń 2021 jyly jemqorlarmen aýyzjalasyp jáne báz bireýlerdi aqshaǵa qolpashtaǵany áshkere boldy. Osylaısha 3 jyl bas bostandyǵynan aıyryldy. Búginde ol osy jazanyń shartty 2 jylyna qatysty isti qaıta qaraýǵa shaǵym túsirgen jaıy bar.

Germanııada Krıstıan Výlf ta joǵarydaǵylardyń kebin kıdi. Burynǵy prezıdent qyzmettik mindetterin oryndaý kezinde qyzmet túrin paıdalanǵany úshin sot aldynan bir-aq shyqty. Degenmen ol 2014 jyly abyroıyn aqtap shyqty.

Para aldy dep aıyptalǵan Italııanyń burynǵy premer-mınıstr Sılvıo Berlýskonıdiń 2021, 2022 jáne 2023 jyldary ótken úsh sot protsesinde qylmysy aqyry dáleldengen joq.

Berlýskonı saıasatqa kelgen 1994 jyldan beri ústinen 30-dan astam qylmystyq is qozǵalypty.

Portýgalııada burynǵy úkimet basshysy Joze Sokrateshke jemqorlyqpen aınalysty degen aıyptar taǵylyp, alaıda sýdıa olardyń barlyǵyn joqqa shyǵaryp, tek aqsha jylystatýǵa qatysty kináli dep tapty.

Sońǵy jıyrma jylda memleket basshylary jıi-jıi isti bolǵan jalǵyz ǵana aımaq bar ­- ol Latyn Amerıkasy. Mysaly, Perýde 1985 jyldan beri taqta otyrǵan prezıdentterdiń bireýinen ózgesi derlik abaqtyǵa qamalyp nemese aıyp taǵylǵan.