Qaýipti júkterdi tasymaldaý erejelerin buzǵany úshin 7,5 mln teńge aıyppul salyndy – Kólik mınıstrligi

<p>ASTANA. KAZINFORM &mdash;&nbsp;&laquo;Nazar aýdaryńyz! Qaýipti júk&raquo; profılaktıkalyq is &mdash; sharasy aıasynda 7,5 mln. teńge aıyppul óndirildi. Aktsııa bastalǵaly beri 50 tasymaldaýshyǵa qaýipti júkterdi tasymaldaý erejelerin buzǵany úshin aıyppul salyndy. Bul týraly Kólik mınıstrliginiń baspasóz qyzmeti málim etti.&nbsp;</p>

Reıdtik is-sharalar Almaty, Aqtóbe jáne Batys Qazaqstan óńirlerinde ótkizildi. Tamyz aıynyń sońyna deıin aktsııa elimizdiń basqa oblystarynda da ótedi.

Bul is-shara Kólik mınıstrligi Avtomobıl kóligi jáne kóliktik baqylaý komıtetiniń bastamasymen júrgizilip jatyr. 

— Aktsııanyń maqsaty — qaýipti júkterdi tasymaldaý qaýipsizdigin qamtamasyz etý jáne qaýipti júkterdi tasymaldaýdy júzege asyratyn jeke jáne zańdy tulǵalardyń Qazaqstan Respýblıkasynyń kólik zańnamasyn saqtaýyn qadaǵalaý. Inspektorlar tirkeý qujattarynyń, jol paraqtarynyń, júrgizýshige arnalǵan nusqaýlyqtardyń, qaýipti júkterdi tasymaldaýǵa ruqsat beretin kýáliktiń bolýyn tekseredi, — delingen habarlamada.

Esterińizge sala keteıik, «Avtomobıl kóligi týraly» QR Zańyna sáıkes tasymaldaý, tıeý-túsirý jumystaryn júrgizý jáne saqtaý kezinde olarǵa tán erekshelikterge baılanysty tehnıkalyq quraldardyń, qurylǵylardyń, ǵımarattar men qurylystardyń jarylýyna, órtenýine nemese búlinýine, sondaı-aq adamdardyń, janýarlardyń ólim-jitimine, jaraqat alýyna jáne aýrýyna sebep bolýy, qorshaǵan tabıǵı ortaǵa zııan keltirýi múmkin kez kelgen zattar, materıaldar, buıymdar, óndiristik jáne ózge de qyzmet qaldyqtary qaýipti júkter dep tanylady.