Qaýipti taksı júrgizýshilerin anyqtap, jazalaý qıyn – mınıstr

<p>ASTANA. KAZINFORM &ndash; Úkimet otyrysynda Іshki ister mınıstri Erjan Sádenov ınternet arqyly taksı qyzmetin kórsetýshilerdiń jumysyn zańmen retteý qajettigin aıtty.</p>

«Jolaýshylardy tasymaldaý salasy da qaýipti deńgeıde. Bar normalar saqtalmaıdy. Internet-taksı júrgizýshileri paıda tabý úshin uıqysyz jáne demalyssyz kólik júrgizedi. Medıtsınalyq tekserýden ótpeıdi, kóliktiń tehnıkalyq jaǵdaıy tekserilmeıdi. Osylaısha, adamdardyń ómirine qaýip tóndiredi. Demalys, mereke kúnderi poıyzǵa bıletterdiń joqtyǵynan, taksı joǵary suranysqa ıe bolady. «Qaýipti» taksı júrgizýshilerin anyqtaý jáne jaýapqa tartý qıyn», - dedi E.Sádenov.

Osyǵan baılanysty kelesi jyldan bastap taksı qyzmetimen aınalysatyn ınternet-agregatorlarǵa qoıylatyn talaptar kúsheıtilmek.

«Internet-agregatorlardyń róli tek tapsyrys bólýmen shekteledi. Sondyqtan kelesi jyldan bastap olarǵa tasymaldaý talaptaryn baqylaý júkteledi. Buǵan, Tsıfrlyq damý mınıstrligi, Eńbek mınıstrligi, Kólik mınıstrligi jáne ákimdikter qatysýy qajet», - dedi Erjan Sádenov.

Sondaı-aq, ol óńir ákimderin qalalar arasynda qatynaıtyn qoǵamdyq kólik sanyn kóbeıtip, baǵasyn sýbsıdııa arqyly arzandatýǵa shaqyrdy. 

«Kólik mınıstrligi men ákimdikterge kelesideı jumystardy uıymdastyrǵany durys. Birinshiden, qalaaralyq jolaýshylar kóligin damytý kerek. Ekinshiden, demalys, mereke kúnderin eskerip, suranysqa ıe baǵyttar boıynsha reıs sanyn kóbeıtý qajet. Úshinshiden, sýbsıdııa arqyly jolaqyny arzandatý kerek. Tórtinshiden, eńbek jáne demalys rejımin baqylaý quraldaryn ornatý usynylady», - dedi mınıstr.