Qaýipsizdik keńesi HAMAS-tyń kelisimdi qabyl alýyn talap etý kerek - AQSh-tyń BUU-daǵy turaqty ókili

<p>ASTANA. KAZINFORM &ndash; AQSh BUU Qaýipsizdik Keńesine Djo Baıden usynǵan Gaza sektorynda tutqyndardy bosatý jáne atysty toqtatý týraly usynysty qoldaıtynyn bildiretin jańa qarar jobasyn usyndy, dep habarlaıdy <a href="https://ru.euronews.com/2024/06/04/gaza-war-update" target="_blank" rel="noopener">euronews</a>.</p>

«Kóptegen kóshbasshylar men úkimetter, sonyń ishinde Taıaý Shyǵys aımaǵyndaǵy elder bul jospardy maquldady jáne biz Qaýipsizdik Keńesin osy kelisimdi keshiktirmeı jáne qosymsha sharttarsyz júzege asyrý úshin qosylýǵa shaqyramyz. Qaýipsizdik keńesi HAMAS-tyń kelisimdi qabyldaýyn talap etýi kerek», - dedi AQSh-tyń BUU-daǵy elshisi Lında Tomas-Grınfıld.

Dúısenbi kúni Mysyr Syrtqy ister mınıstrligi HAMAS bul usynysty «oń qarastyryp jatqanyn» málimdedi. Sonymen birge Izraıl premer-mınıstri Bınıamın Netanıahý soǵysty toqtatý týraly kelisimniń Baıden nusqasynda «olqylyqtar» bar ekenin málimdedi.

Onyń aıtýynsha, AQSh prezıdenti Djo Baıden óz sózinde keıbir mańyzdy málimetterdi, sonyń ishinde Izraıldiń soǵystyń ekinshi kezeńde aıaqtalatynymen kelispeıtinin aıtpaǵan.

Buǵan deıin Netanıahý kabınetindegi eki ońshyl mınıstr - Itamar Ben Gvır men Betsalel Smotrıch Baıden usynǵan sharttar boıynsha kelisim jasalsa, úkimettik koalıtsııadan shyǵamyz dep qorqytqan. Olardyń partııalary Knessettegi 14 oryndy baqylaıdy jáne olardyń qoldaýynsyz Netanıahý kópshilik daýysqa ıe bolmaıdy.

Óz kezeginde oppozıtsııa jetekshisi ıAır Lapıd Netanıahýdy kepilge alynǵandar týraly kelisim boıynsha qoldaý kórsetýge ýáde berdi.

Kelisim qabyldanbasa Izraıl odan saıyn oqshaýlanyp, Netanıahý bolsa premerlik ornyn qorǵaý úshin kepilge alynǵandardy qutqarýdan bas tartqan adam retinde odan da qatal synǵa ushyraýy múmkin.

Yqtımal kelisimdi talqylaý Izraıldiń Rafahta jalǵasyp jatqan operatsııasy aıasynda ótip jatyr. Soǵys saldarynan ońtústiktegi osy qalany panalaǵan bosqyndardyń kópshiligi Gazanyń basqa bólikterindegi qaýipsiz aımaqtardy izdep, qazirdiń ózinde ony tastap ketken.