Qaýipsizdik erejesin saqtamaǵan kásiporyn jumysyn toqtatýǵa bolady - senator

ASTANA. QazAqparat – QR Parlamenti Senatynyń depýtaty Qaırat Qojamjarov Qaraǵandy oblysynda bolǵan qaıǵyly jaǵdaı týraly pikir bildirdi, dep habarlaıdy QazAqparat tilshisi.

«Bul jerde qylmystyq is qozǵaýǵa negiz bar. Bizdiń quzyrly organdar is qozǵaýy kerek, tergeý qajet. Al endi «Arselor Mıttaldyń» basshylaryna, olardyń quryltaıshylaryna bizdiń sharttarymyz, talaptarymyz, árıne, qazir ózgerýi kerek. Sol sebepti biz ony qoldaımyz. Senat qabyrǵasynda da jaqyn arada kóteremiz. Sharttyń ózgerýi degende olarǵa qatysty talap qatań bolýy tıis. Bir jaǵynan, jabdyqtardy jańartyp, tehnıkalyq erejelerdi saqtaý qajet. Durys aıtasyzdar, aıyppulmen ǵana qutylyp ketip jatyr. Al endi Qylmystyq kodekste bir zań bar. Eger osyndaı jaǵdaıǵa quryltaıshylar nemese basshylar kináli bolsa, oqıǵa saldarymen basshylardyń áreketiniń arasynda tikeleı baılanys bolsa, qylmystyq ákimshilik jáne materıaldyq jaýapqa tartylady», - dedi senator.

Qaırat Qojamjarovtyń aıtýynsha, qoldanystaǵy zańnamada eńbek jáne óndiris qaýipsizdigin saqtamaǵan kásiporyndardyń jumysyn toqtatýǵa negiz bolatyn baptar bar.

«Búgingi qoldanystaǵy zańnamada qaýipsizdik erejelerin saqtamaǵan kásiporyndardyń jumysyn toqtatýǵa múmkindik bar. Eger kópshiliktiń ómirine nemese densaýlyǵyna qater tónip tursa, prokýratýra organdary osyndaı sheshim qabyldaı alady»,- dedi depýtat.