Qatysýshylardyń 79,4 paıyzy Ata zańǵa engiziletin ózgertýlerdi qoldady - Exit poll

NUR-SULTAN. QazAqparat – Exit poll nátıjesinde qazaqstandyqtardyń 79,4 paıyzy Konstıtýtsııaǵa engiziletin túzetýler men ózgertýlerdi qoldap daýys berdi. Bul jaıynda «Demokratııa ınstıtýty» ǵylymı-zertteý qaýymdastyǵy» qoǵamdyq birlestiginiń dırektory Tatıana Basharına aıtty, dep habarlaıdy QazAqparat tilshisi.

«Demokratııa ınstıtýty» ǵylymı-zertteý qaýymdastyǵy» qoǵamdyq birlestigi saılaý ýchaskeleriniń shyǵa berisinde Exit poll ótkizdi. Saýalnama alý 375 ýchaskede, onyń ishinde 225 qalalyq jáne 150 aýyldyq referendým ýchaskesinde júrgizildi. 15 myńnan adamnan saýalnama alyndy. Zertteý qorytyndysynyń qateligi 2,7 paıyzdy quraıdy. Demokratııa ınstıtýty Exit poll birinshi ret ótkizip otyrǵan joq. Ol Qazaqstanda 2007 jyldan bergi saılaý naýqandary kezinde beıimdelgen ádisteme arqyly júrgizildi», - dedi birlestik dırektory KTK telearnasynyń tikeleı efırinen.

Onyń atap ótýinshe, saılaý ýchaskeleriniń shyǵa berisinde daýys berýshilerge birlestiktiń saýalnama alýshylary «Siz Konstıtýtsııaǵa engiziletin ózgeristerdi qoldap álde qarsy daýys berdińiz be?» degen suraq qoıǵan. Sonymen qatar suhbat alýshylar daýys berýshilerdiń belsendiligin de tirkegen.

«Exit poll qorytyndysy boıynsha referendýmǵa qatysý 66,3 paıyzdy qurady. Jaqtap daýys bergender - 79,4, al qarsy bolǵandar - 20,6 paıyz», - dedi Tatıana Basharına.

Budan buryn habarlanǵandaı, referendým barysynda el turǵyndary Konstıtýtsııamyzdyń 33 babyna 56 ózgeris engizý máselesine qatysty óz daýystaryn berdi.

5 maýsymda astana ýaqytymen saǵat 21.00-de elimizdiń barlyq óńirindegi referendým ýchaskelerinde daýys berý aıaqtaldy.

QR Ortalyq referendým komıssııasynyń hatshysy Muhtar Erman Ata zańǵa engiziletin ózgertýler men tolyqtyrýlarǵa qatysty ótkizilgen respýblıkalyq referendýmda 8 030 739 azamat bıýlleten alǵanyn aıtty.

Osydan týra bir aı buryn QR Prezıdenti Qasym-Jomart Toqaev 5 maýsymda respýblıkalyq referendým ótkizý týraly Jarlyqqa qol qoıǵan edi.