Qatty turmystyq qaldyqtar salasyndaǵy básekelestikti damytý jol kartasy ázirlenedi
«Qazaqstan Respýblıkasynyń Básekelestikti qorǵaý jáne damytý agenttigi básekelestik deńgeıin aıqyndaý, ústem nemese monopolııalyq jaǵdaıǵa ıe naryq sýbektilerin anyqtaý maqsatynda, sondaı-aq básekelestikti qorǵaýǵa jáne damytýǵa baǵyttalǵan keshendi sharalardy ázirleý úshin 2020, 2021 jyldar jáne 2022 jyldyń 8 aıy kezeń ishinde qatty turmystyq qaldyqtardy jınaý, áketý, suryptaý jáne kómý (budan ári – QTQ) boıynsha naryqta taldaý júrgizdi. Taldaý qorytyndysy boıynsha agenttik bul naryqtyń damymaǵan básekelestikpen joǵary shoǵyrlanǵanyn anyqtady. Osyǵan baılanysty, osy naryqta básekelestiktiń teń qoljetimdiligin jáne odan ári damýyn qamtamasyz etý maqsatynda mınıstrlik agenttikpen birlesip QTQ salasyndaǵy básekelestikti damytý jónindegi jol kartasyn (budan ári – Jol kartasy) ázirleıdi», - dep atap ótedi birinshi vıtse-mınıstr jaýabynda.
Onyń atap ótýinshe, jol kartasy aıasynda konkýrs qorytyndylary boıynsha QTQ naryǵynyń áleýetti qatysýshylaryn aıqyndaý boıynsha irikteý krıterııleri, jınaýǵa arnalǵan biryńǵaı úlgilik shartty belgileý kózdeledi. QTQ tasymaldaý, QTQ jınaý, áketý jáne kómý jónindegi qyzmetterdi jetkizýshilermen jasalatyn sharttardyń qoldanylý merzimin 10 jyldan aspaıtyn merzimge reglamentteý, QTQ jınaý, áketý boıynsha (aýdandar men ýchaskeler boıynsha) naryq shekaralaryn oblystyq, respýblıkalyq mańyzy bar qalalarda lottar boıynsha bólýdi reglamentteý qarastyrylady.
«Budan basqa, jol kartasy aıasynda jyl saıynǵy ındeksteýdi eskere otyryp, 2 jylda 1 ret QTQ tarıfin qaıta qaraý, jaqsy damyǵan básekelestikpen QTQ jınaý, áketý jónindegi qyzmetterdi júzege asyratyn memlekettik qatysýy bar uıymdardy jekeshelendirýdiń keshendi josparyna engizý máseleleri pysyqtalatyn bolady», - dedi Núrken Shárbıev.