Katonqaraǵaıdaǵy orman órti: Tikushaqpen 10 ret sý tógildi, jumystar jalǵasýda

ÓSKEMEN. QazAqparat – Shyǵys Qazaqstan oblysy Katonqaraǵaı aýdanyndaǵy orman órtimen kúres jalǵasýda, dep habarlaıdy QazAqparat tilshisi.

ShQO Tótenshe jaǵdaılar departamenti baspasóz qyzmetiniń málimetine súıensek, eldi mekenderge eshqandaı qaýip tónip turǵan joq. Tilsiz jaýdyń jalpy aýdany anyqtalýda.

«Jetýi qıyn taýly jerde shóp pen buta órtenýde. Sol jerge órt sóndirýshilerdiń, ormanshylardyń, jergilikti atqarýshy organdardyń jáne «Qazavıaormanqorǵaý» mekemesiniń jeke quramynan 123 adam, 3 tehnıka jumyldyrylǵan. ShQO ákimdiginiń avıatsııa bólimshesiniń 2 tikushaǵy da tartyldy. Tikushaqtarmen barlyǵy 10 ret sý tógildi. Belsendi janý oshaqtary joq. Keı jerlerde jekelegen tútinder baıqalady. Ol jerlerde de jumystar júrgizilip jatyr. Órttiń taralýyna jol berilgen joq», - delingen aqparatta.

Oqıǵa ornynda ShQO ákiminiń orynbasary Erjan Nurbaev júr. Oblys ákimi Ermek Kósherbaev qazir Rıdder qalasynan 80 shaqyrym jerde tutanǵan órtpen kúres jumystaryn baqylaýda. Ondaǵy órt oqshaýlanǵan.

Shyǵys Qazaqstan oblysynyń Katonqaraǵaı aýdanynda orman órtenip jatqanyn buǵan deıin habarlaǵan bolatynbyz.