Katonqaraǵaıda 40 myń halyqqa arnap salynǵan aýrýhananyń eki qabaty bos tur

ASTANA. QazAqparat – «Áleýmettik medıtsınalyq saqtandyrý qory» kommertsııalyq emes aktsıonerlik qoǵamynyń basqarma tóraǵasy Sábıt Ahmetov MÁMS boıynsha jumys isteıtin emhanalardyń moınynda kredıtorlyq qaryz nege qalyptasyp jatqanyn túsindirdi, dep habarlaıdy QazAqparat tilshisi.

«Bizge emhanalar shaǵymdandy. Mindetti áleýmettik medıtsınalyq saqtandyrý qorynan jospar boıynsha jiberilgen ótinimdegi qarajattyń 30 ne 40 protsenti ǵana túsedi eken. Saldarynan naýqastardy MÁMS aıasynda emdeýge aqshamyz jetpeı jatyr, kredıtorlyq qaryzǵa battyq deıdi. Qordyń aqshasyn jekemenshik jáne memlekettik emhanalarǵa bólý qalaı iske asady?» dep surady BAQ ókili.

Sábıt Ahmetovtiń aıtýynsha, bul máseleni ár emhana boıynsha jeke-jeke qaraý kerek.

«Siz aıtyp otyrǵan 30 paıyz qarajat degen - jyl basynda túsetin avans. Jyl basynda emhanalar jumysyn toqtatpaý úshin avans retinde suratylǵan aqshanyń 30 paıyzy beriledi. Odan keıin aı saıyn bólinip otyrady. Olardyń kredıtorlyq bereshegine kelsek, ár jaǵdaıdy jeke qaraý kerek. Óıtkeni sebepteri ár túrli bolýy múmkin. Keı emhanalarda shtat sanyna baılanysty túsken tabysynan jumsalǵan shyǵyny asyp ketip jatady. Mysaly, Katonqaraǵaıda (Shyǵys Qazaqstan oblysy - red.) emhanamyz bar. Aýdany 19 myń sharshy metr bolady. Áýelde 40 myń halyq bar degen eseppen salynǵan. Qazirgi tańda ol jerde 10 myń adam turady. Sondyqtan ekinshi qabat pen úshinshi qabat bos tur. Ol jaqta qys uzaq ekenin bilesiz. Jyly ustaý kerek degendeı. Túsken aqshanyń bári osyndaı shyǵyndarǵa ketip qalady da, qaryz bolyp qala beredi», - dedi qor basshysy.