Katonqaraǵaı aýylyndaǵy áýejaı kúrdeli jóndeýden ótýi múmkin

<p>ASTANA. KAZINFORM &ndash; Kólik mınıstrligi Kazinform saýalyna joldaǵan jaýapta Shyǵys Qazaqstan oblysyndaǵy Katonqaraǵaı aýdanynyń ortalyǵyna áýe qatynasyn qalpyna keltirýdiń keleshegi týraly málimet berdi.</p>

«Katonqaraǵaı aýylynyń soltústik-shyǵys bóliginde 1982 jyly salynǵan burynǵy áýejaı kesheni bar. Áýejaı irgeles jer ýchaskesimen «Shyǵys Qazaqstan oblysynyń avıatsııalyq bólimshesi» sharýashylyq júrgizý quqyǵy bar kommýnaldyq memlekettik kásipornyna tıesili. Nysan tikushaq tehnıkasyna arnalǵan alań jáne janarmaı quıý stantsııasy retinde paıdalanylady. Áýejaıdyń qazirgi tehnıkalyq jaı-kúıi azamattyq avıatsııanyń qoldanystaǵy talaptaryna sáıkes kelmeıdi, turaqty ushýlardy qalpyna keltirý úshin áýejaıdy tolyq rekonstrýktsııalaý qajet. Shyǵys Qazaqstan oblysynyń ákimdigi Kólik mınıstrligimen birlesip, osy máseleni Ulttyq ınfraqurylymdyq jospardyń jobasyna engizý múmkindigin pysyqtap jatyr», - dep jazylǵan resmı málimette.

Mınıstrlik málimeti boıynsha, bıyl Balqash qalasyndaǵy áýejaıdyń rýldeý joly men perronyna kúrdeli jóndeý júrgizilmek.

«Qazirgi tańda jobalaý-smetalyq qujattama ázirlenip, qarjylandyrý kózderi anyqtaldy. Budan basqa, Úrjar, Úsharal, Zaısan jáne Arqalyq qalalarynda áýejaılar salý jáne rekonstrýktsııalaý máselesiniń oryndylyǵy boıynsha da jumystar júrgizilip jatyr», - delingen jaýapta.

Buǵan deıin Kólik mınıstri Marat Qarabaev Shyǵys Qazaqstan oblysynyń Katonqaraǵaı aýdanynda áýejaı salý máselesi qarastyrylyp jatqanyn birneshe ret aıtqan bolatyn.