Katonqaraǵaı aýdanynda 20 mektep jóndeýden ótti – ShQO

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov Katonqaraǵaı aýdanyna jumys saparymen baryp, shekaralyq aýmaqtardy damytý baǵdarlamasy aıasynda atqarylyp jatqan jumystarmen tanysty, dep habarlaıdy QazAqparat tilshisi.

Búginde Katonqaraǵaı aýdanynda atalmysh baǵdarlama boıynsha 6 mıllıardtan astam teńgege 76 joba júzege asyrylǵan. Nátıjesinde 20 mektepte, 6 mádenı oshaqta jóndeý jumystary júrgizildi. Aýylaralyq 30 shaqyrym jolǵa asfalt tóseldi.

Sonymen qatar Katonqaraǵaı aýylyndaǵy saıabaq tolyqtaı abattandyrylǵan. Jaqynda osy saıabaqta Altaıdyń asqar jazýshysy Dıdahmet Áshimhanovqa eskertkish ornatyldy. Aýylda zamanaýı talaptarǵa saı jabyq basseıni bar dene shynyqtyrý-saýyqtyrý kesheni boı kótermek. Keler jyldyń mamyr aıyna deıin jumystar tolyq aıaqtalyp, nysan qoldanysqa beriledi dep josparlanýda. Jobanyń jalpy quny – 730 mln teńge. Merdiger kompanııa negizgi qurylys-montajdaý jumystaryn bıyl aıaqtamaq.

«Eki jyl buryn Soldatovo aýylynda bolǵan edim. Sol kezde eldi mekendegi Mádenıet úıin jóndeýge qarajat bólýdi tapsyrdym. Búgin atqarylǵan jumystyń nátıjesi kóńilimnen shyqty. Klýb ishinde dárigerlik ambýlatorııa, sport zaldar jáne jergilikti ákimdik ornalasqan. Aýylǵa ortalyqtandyrylǵan sý qubyrlary tóseldi. Búginde 200-ge tarta abonent qosylǵan», - dedi Danıal Ahmetov

Aıta ketý kerek, sońǵy jyldary Katonqaraǵaı aýdanyndaǵy 9 aýylǵa aýyzsý tartyldy. Buǵan bólek, kópbalaly analardy qoldaý baǵdarlamasy da nátıjeli júzege asýda. Qazirgi tańda aýdan ortalyǵynda eki páterli 10 úıdiń qurylysy aıaqtalýǵa shaq qaldy. Taǵy 30 páterli kópqabatty úı salý josparlanǵan.