Katarlyq ınvestorlar elimizdegi sút-taýar fermalarynyń qurylysyn qarjylandyrady
Kezdesý barysynda taraptar sútti baǵyttaǵy mal sharýashylyǵy salasyndaǵy ekijaqty yntymaqtastyq máselelerin talqylady.
Mınıstr óz sózinde sútti mal sharýashylyǵyn damytý Qazaqstandaǵy agroónerkásiptik keshendi damytýdyń ulttyq jobasy tujyrymdamasynyń negizgi basymdyqtarynyń biri bolyp tabylatynyn atap ótti.
Qazirgi ýaqytta 2021-2025 jyldary aralyǵynda jalpy óndiristik qýaty jylyna 597,7 myń tonna sút óndiretin 106,8 myń basqa arnalǵan 169 sút-taýar fermasyn iske qosý jónindegi jospar ázirlengen.
Sút-taýar fermalarynyń qosymsha qýattaryn iske qosý respýblıkanyń ishki naryǵyn 2024 jyldyń sońyna qaraı otandyq sút ónimderimen 100% - ǵa qamtamasyz etýge múmkindik beredi. Bul sáıkesinshe sút ónimderin ózge elderge eksporttaý kólemin ulǵaıtady.
Bul salaǵa sheteldik ınvestıtsııalardyń kelýi onyń josparly damýyna yqpal etedi. Búginde ınvestorlarǵa «bir tereze» qaǵıdaty boıynsha qyzmetterdiń tolyq spektri kórsetiledi. Sondaı-aq, ınvestıtsııadan keıingi kezeńde de tolyq monıtorıng júrgizilip, árbir ınvestormen naqty jobalardyń aıasynda barlyq deńgeılerde tıisti jumystar atqarylady.
«Qazaqstan Respýblıkasynyń zor ınvestıtsııalyq áleýeti bar. Biz ınvestorlar úshin tıisti jaǵdaı jasaý, ınvestıtsııalarǵa kepildik berý, olardyń qaýipsizdigin qamtamasyz etý jáne túrli táýekelderdi barynsha azaıtý úshin barlyq qajetti jumystardy júrgizemiz», - dedi mınıstr.
Óz kezeginde Aıdan Tynan Baladna Food Industries kompanııasynyń qyzmeti jáne aldaǵy damý josparlary týraly aıtyp, sút ónimderin tutynýdyń ósýi jáne halyqtyń kóbeıýi esebinen bolashaqta sútti tutyný tek arta túsetinin atap ótti.
Aıdan Tynannyń aıtýynsha, Qazaqstan Respýblıkasynyń Ońtústik-Shyǵys Azııa elderine sút jáne sút ónimderin eksporttaýshy el bolýyna barlyq múmkindikteri bar.
Sondaı-aq, Aıdan Tynan mınıstrge Qazaqstannyń kásipkerlerimen kezdesýler ótkizgenin jáne onda birqatar ınvestıtsııalyq jobalar tanystyrylǵany týraly habarlady. Atap aıtqanda, Almaty qalasyndaǵy 250-den astam joǵary bilikti jumys oryndaryn qura otyryp, qýaty táýligine 150 tonna shıkizat bolatyn irimshik óndirý zaýytyn salý jobasy týraly aıtty.
Taǵy bir ınvestıtsııalyq joba Qostanaı oblysynda jylyna 106 myń tonna ónim shyǵaratyn shıki sıyr sútin óndirýge arnalǵan 8 sút-taýar fermasyn salý bolyp tabylady.
«Eksporttyq áleýetti damytý jáne ınnovatsııalyq ekonomıkany damytý turǵysynan el aldyna qoıǵan maqsattardy eskere otyryp, Bizdiń kezdesýimiz óte mańyzdy ekenin atap ótkim keledi. Qazaqstan Respýblıkasy Aýyl sharýashylyǵy mınıstrligi ınvestıtsııalyq jobalardy iske asyrýǵa qoldaý kórsetýge jáne jan - jaqty kómek kórsetýge daıyn», - dedi Erbol Qarashókeev.
Kezdesý qorytyndysy boıynsha taraptar kelissózder nátıjelerine sáıkes, barlyq aspektiler boıynsha yntymaqtastyqty jalǵastyrý týraly ýaǵdalasty.
Baladna Food Industries - Katarlyq sút-taýar fermasyna ıelik etetin jáne jańa tabıǵı sút jáne sút ónimderin óndirýge mamandanǵan aýyl sharýashylyǵy kompanııasy. Kompanııa Katardaǵy eń iri azyq-túlik jáne sút óndirýshisi, eldegi jańa sút ónimderiniń 95% - dan astamyn óndiredi.