Qatarlyqtar Bereke Bank-ten basqa qaı salalarǵa ınvestıtsııa salyp jatyr
Memleket basshysynyń 2024 jylǵy aqpandaǵy Qatarǵa saparynyń qorytyndysy boıynsha eki el arasyndaǵy ýaǵdalastyqtardy iske asyrý úshin bıylǵy 20 naýryzda Doha qalasynda Kelisimge qol qoıyldy.
«Kelisim ınvestorlar úshin táýekelderdi azaıtýdy, tartymdy ınvestıtsııalyq orta qalyptastyrýdy kózdeı otyryp, elimizge jalpy somasy 20 mıllıard AQSh dollaryna jýyq ınvestıtsııa tartýǵa múmkindik beredi. Jalpy, Kelisimde elimizde telekommýnıkatsııa, energetıka, gaz óndirý jáne tasymaldaý, qarjy salalaryn qosa alǵanda, 9 birlesken ınvestıtsııalyq jobany iske asyrý eskerilgen. Onyń ishinde «BEREKE BANK» AQ-nyń 100% aktsııasyn «LESHA BANK»-tyń satyp alýy jónindegi jobasy qamtylǵan. Bul joba Memleket basshysynyń 2023 jylǵy Qazaqstan halqyna Joldaýy aıasynda qaralǵan bank salasyndaǵy básekelestikti arttyrý maqsatynda elge 3 senimdi sheteldik bankti tartý tapsyrmasynyń iske asyrylýyn qamtamasyz etedi. Jobany iske asyrý qarjy júıesine jańa kapıtal tartýǵa múmkindik beredi», - dedi QR Premer-Mınıstriniń orynbasary –Ulttyq ekonomıka mınıstri Nurlan Baıbazarov.
Onyń aıtýynsha, «Qazaqtelekom» AQ-nyń «MOBAIL TELEKOM»-SERVISІN» qatarlyq «Power INTERNATIONAL HOLDING» kompanııasyna satýy telekommýnıkatsııa salasynda básekelestiktiń ósýine yqpal etedi.
«Kelesi kelisim qýattylyǵy jylyna 1, 2.5, 6 mlrd tekshe metr gaz óńdeý zaýyttaryn salý jónindegi 3 jobany qamtıdy. Atalǵan jobalardy iske asyrý Qashaǵan ken ornynyń resýrstyq bazasyn utymdy paıdalanýǵa, sondaı-aq eldiń ishki qajettilikterin jabý úshin taýarlyq gaz óndirisin ulǵaıtýǵa baǵyttalǵan. Gaz óńdeý zaýyttarynyń iske qosylýy jylyna 6,9 mlrd tekshe metr taýarlyq gazdy, 410 myń tonna suıytylǵan kómirsýtek gazyn, 60 myń tonna gaz kondensatyn jáne 770 myń tonna kúkirt óndirýge múmkindik beredi. Jalpy, atalǵan jobalar elimizde taýarlyq gaz óndirisiniń kólemin 18%-ke ulǵaıtady», - dedi mınıstr.
Kelesi joba «BEINEÝ-BOZOI-ShYMKENT» magıstraldyq gaz qubyrynyń ekinshi jelisin salýǵa qatysty. Jobany iske asyrý elimizdiń energetıkalyq qaýipsizdigin qamtamasyz etýge múmkindik beredi. Sondaı-aq gaz tasymaldaý júıesiniń ótkizý qýatyn ulǵaıtýdy, Qytaı Halyq Respýblıkasy baǵyty boıynsha gaz eksportynyń kólemin saqtaýdy, Almaty jylý elektr ortalyǵyn gazǵa aýystyrýdy qamtamasyz etedi. Jalpy, jobany iske asyrý ońtústik, ortalyq jáne soltústik óńirlerdiń ulǵaıyp otyrǵan qajettilikterin qanaǵattandyrýǵa jáne eksporttyq kólemdi qoldaýǵa múmkindik beredi.
Budan bólek, KS-14 jańa kompressorlyq stantsııasy men «KS-14-QOSTANAI-AQTÓBE» magıstraldyq gaz qubyryn salý jobasy qamtylǵan. Joba Qostanaı qalasy men Qostanaı oblysynyń turǵyndaryn gazben jabdyqtaýdy qamtamasyz etýge, sondaı-aq elimizdiń gaz tasymaldaý júıesiniń ótkizý qýatyn arttyrýǵa baǵyttalǵan. Joba Qostanaı oblysyn jáne jergilikti ónerkásip kásiporyndaryn gazben jabdyqtaýdy qamtamasyz etedi, bul óńirdiń energetıkalyq qaýipsizdigin arttyrady.
Qyzylorda oblysynda bý-gaz qondyrǵysy bazasynda elektr stantsııasyn salý jobasy eskerilgen. Jobany iske asyrý jańa manevrlik qýattardy engizý maqsatynda bý-gaz qondyrǵysyn salýǵa, sondaı-aq «Qyzylorda-Shymkent» jáne «Qyzylorda-Jezqazǵan» elektr berý jelilerin salýǵa baǵyttalǵan.
«Ertis ózeninde qýaty 350 MVt-qa deıin sý elektr stantsııasyn salý jobasy qarastyrylǵan. Joba jańa manevrlik qýattardy engizý, sondaı-aq Shúlbi sý elektr stantsııasynyń kontrretteý fýnktsııasyn oryndaý maqsatynda ázirlendi. Jobany iske asyrý Shúlbi sý elektr stantsııasynyń tıimdiligin 1050 MVt-qa deıin ulǵaıtýǵa, sondaı-aq Ertis ózeniniń aǵysy boıynsha qysqy kezeńde sý tasqyny yqtımaldyǵyn joıýǵa múmkindik beredi», - dedi vedomstvo basshysy.
Atap aıtqanda, qabyldanǵan kelisimde qazaqstandyq tarap qatarlyq ınvestıtsııalar úshin turaqty salyq rejımin, sondaı-aq Qazaqstan aýmaǵynda qatarlyq ınvestıtsııalardy qorǵaýdy qamtamasyz etedi.