Qatarlyq ınvestor qazaqstandyq bankti satyp alýǵa nıet bildirdi

<p>ASTANA. KAZINFORM &ndash; Shtab-páteri Dohada ornalasqan Lesha Bank &laquo;Báıterek&raquo; holdıngine tıesili qazaqstandyq banktiń aktsııalaryn satyp alý josparyn aıtty. Bul týraly Katar qor bırjasynyń saıtynda jarııalanǵan resmı málimdemede aıtylǵan.</p>

«Lesha Bank 2024 jylǵy 14 aqpanda «Báıterek» Ulttyq holdıngi» AQ-men banktiń barlyq jarǵylyq kapıtalyn satyp alý týraly aldyn ala bastapqy kelisim jasasty», - delingen habarlamada.

Málimdemede qaı qazaqstandyq bank týraly sóz qozǵalyp jatqany kórsetilmegen. Aıta keterligi, «Báıterek» UBH 2022 jyldyń qyrkúıeginde «Bereke» bankiniń jalǵyz ıesi atandy.

«Buǵan deıin Qatar First Bank (QFB) retinde belgili bolǵan Lesha Bank Qatar qarjy ortalyǵynyń retteýshi organy (QFCRA) ruqsat bergen jáne Qatar qor bırjasynda lıstıngten ótken sharıǵat talaptaryna sáıkes keletin alǵashqy táýelsiz bank. Bank tartymdy premıým ınvestıtsııalyq múmkindikter men ınnovatsııalyq qarjylyq sheshimderdi usyna otyryp, ınvestıtsııalyq seriktes retinde áreket etedi», - delingen onyń resmı saıtynda.