Qatar ulttyq murajaıynda qazaqsha aýdıogıd iske qosyldy

<p>Qatardyń ulttyq murajaıy qazaqstandyq týrısterge arnap eldiń tarıhy men mádenıetin, biregeı dástúri men ómir saltyn qazaq tilinde baıandaıtyn aýdıogıdti iske qosty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Búgingi tańda atalǵan aýdıotýr arab jáne aǵylshyn tilderinen bólek frantsýz, koreı, túrik, hındı, ıspan, orys jáne ýkraın tilderine aýdarylǵan.

Memlekettik tildiń abyroıy men bedelin arttyrý maqsatynda Qazaqstannyń Qatardaǵy Elshiliginiń Doha qalasynda bilim alyp jatqan bir top qazaqstandyq stýdenttermen júzege asyrǵan birlesken jobasy aıasynda murajaı jádigerleri týraly aýdıo aqparat qazaq tiline aýdarylyp dybystaldy.

Qatardyń tarıhy men sırek kezdesetin jádigerleri týraly otyz bir bólimnen turatyn aýdıotýr Qatar Ulttyq murajaıyna kelýshiler úshin de, murajaıdyń resmı saıty arqyly oqyrmandarǵa da qashyqtyqtan qoljetimdi.

Jalpy, Qazaqstan men Qatar arasyndaǵy mádenı yntymaqtastyqqa súbeli úlesin qosatyn bul joba memlekettik tildiń halyqaralyq deńgeıde tanymaldyǵyn arttyrýǵa, shetelde turyp jatqan otandastar úshin ana tilin bilý deńgeıin jetildirýge septigin tıgize otyryp, qazaq tilin oqýǵa qyzyǵýshylyq tanytqan árbir azamattyń talpynysyna jiger beredi.

Qatar ulttyq murajaıy Taıaý Shyǵys óńirindegi murajaılardyń ishinde jádigerlerdiń eń qomaqty qorynan bólek, óziniń tańǵajaıyp sáýletimen erekshelenedi.

Murajaı ǵımaratynyń shól raýshany pishindes dızaınyn Prıttsker júldesiniń ıegeri áıgili frantsýz arhıtektory Jan Nývel jasaǵan.

Byltyr fýtboldan álem chempıonaty ótken Doha qalasy óńirde úlken qarqynmen damyp kele jatqan jańa týrıstik baǵyt deýge bolady. 2022 jyly Qatar 2,5 mln. týrısti qabyldaǵan.

Olardyń kóbin AQSh, Eýropalyq Odaq, Qytaı jáne kórshiles arab elderiniń azamattary quraǵan.

Qatar Memleketiniń qazaqstandyq týrıster arasynda da tanymaldyǵy artýda.

Eki el arasynda vızasyz rejım ornatylyp, turaqty jáne charterlik tikeleı áýe reısterdiń ashylýy nátıjesinde 2022 jyldyń basynan beri shamamen 20 myń qazaqstandyq Qatarǵa saparmen bardy.

Aldaǵy ýaqytta bul kórsetkishtiń ósýin kózdelgenin eskere otyryp, eki eldiń áýe kompanııalary tikeleı reıster sanyn 28-ge deıin ulǵaıtyp, Qazaqstannyń 5 qalasynan (Astana, Almaty, Shymkent, Atyraý, Aqtóbe) tikeleı charterlik reıster ashýdy josparlap otyr.