Qatar-2022: Japonııa jankúıerleri oıynnan soń stadıondy qoqystan tazartyp ketti
13:36, 24 Qarasha 2022
ASTANA. QazAqparat - Qatarda ótip jatqan fýtboldan álem chempıonatynda japonııalyq jankúıerler mádenıettilik úlgisin kórsetip, stadıonda ózderi otyrǵan jerdegi qoqysty tazartty, dep habarlaıdy QazAqparat tilshisi.
Qatar astanasy - Doha qalasyndaǵy «Halıfa Interneıshnl» stadıonynda ótken oıynda Japonııa quramasy Germanııany 2:1 esebimen jeńdi.
Tarıhı jeńisten keıin japonııalyq jankúıerler mádenıettilik úlgisin kórsetti. Ózderi ornalasqan bóliktegi qoqysty tazartyp, ony arnaıy jáshikterge jetkizdi. Osylaısha ózgelerge ónege kórsetti.
E tobynda synǵa túsetin Japonııa quramasy endi ekinshi týrda 27 qarashada Kosta-Rıkamen kezdesedi.
Foto: © Dmıtrıı Zanın / Match TV