Qatar-2022: Úıine ury túsken aǵylshyndyq fýtbolshy eline qaıtyp ketti

ASTANA. QazAqparat – Anglııa quramasynyń oıynshysy Rahım Sterlıng úıine ury túskendikten, eline qaıtyp ketti, dep habarlaıdy QazAqparat tilshisi.

Brıtandyq Daily Telegraph jýrnalısi Mett Loý málim etkenindeı, Qatarda ulttyq qurama sapynda oınap júrgen fýtbolshy R.Sterlıngtiń Londondaǵy úıin ótken senbide urylar tonap ketken.

Óz týǵandarynyń aman ekenine kóz jetkizý úshin úsh kishkentaı balasy bar Rahım Ulybrıtanııaǵa oralýdy jón kórgen. Sol sebepti ol Anglııanyń 1/8 fınalda Senegalmen ótken oıynyna qatysa almady. Fýtbolshy Qatarǵa qaıtyp oralýy múmkin ekendigi jazylady. Ol ázirge álem chempıonatynda bir gol soqty.

Senegaldy 3:0 esebimen jeńgen Anglııa shırek fınalda 10 jeltoqsanda álem chempıony - Frantsııamen kezdesedi.

Anglııa quramasynyń bas bapkeri Garet Saýtgeıt Rahım Sterlıngtiń eline ketkenin rastap, otbasy birinshi orynda turýy kerektigin, oıynshyny qoldaıtynyn jetkizdi.

Eske sala keteıik, budan buryn Olıve Jırýdiń Frantsııa quramasynyń úzdik mergen oıynshysy atanǵanyn jazǵan bolatynbyz.

Sondaı-aq Polshany utqan Frantsııa shırek fınalǵa joldama aldy.

Kılıan Mbappe álem chempıonattarynda 9 gol soqqan alǵashqy jas oıynshy atandy.

FOTO: ROBBIE JAY BARRATT — AMA/GETTY IMAGES