Qatar-2022: Keılor Navas eń kóp gol jiberip alǵan qaqpashy atandy

ASTANA. QazAqparat - Qatarda ótip jatqan fýtboldan 2022 jylǵy álem chempıonatynda toptyq kezeńnen keıin eki fýtbolshy qaqpasyna gol jibergen joq, dep habarlaıdy QazAqparat tilshisi.

Qazirge deıin ártúrli qurama sapynda 40 qaqpashy jasyl alańǵa shyǵyp úlgerdi.

Onyń arasynan brazılııalyq Adıson Beker eki kezdesýde óz qaqpasyn goldan aman saqtasa, marokkolyq Mýnır Mohamedı bir oıynda dál sondaı nátıjeni qaıtalady.

Al Kosta-Rıkanyń qaqpashysy Keılor Navas úsh oıynda óz qaqpasynan 11 gol alyp shyqty.

Atalǵan qurama Ispanııadan 0:7, Germanııadan 2:4 esebimen jeńilse, Japonııany 1:0 esebimen tize búktirdi. Óz tobynda úsh upaımen tórtinshi oryndy qanaǵat tutty.

Eske salsaq, budan buryn Belgııa qaqpashysy Tıbo Kýrtýa ulttyq qurama sapyndaǵy 100-shi oıynyn ótkizdi.

Sondaı-aq, Saýd Arabııasy quramasy álem chempıonaty toptyq kezeńiniń antırekordyn tirkedi.