Qatar-2022: Ispanııa men Germanııa quramalary teń tarqasty
Birinshi týrda ıspanııalyqtar Kosta-Rıkany 7:0 esebimen tas- talqan etse, germanııalyqtar kútpegen jerden Japonııaǵa ese jiberdi – 1:2.
Ekinshi týrda Japonııa Kosta-Rıkany jeńse, joldamaǵa kúni buryn ıe bolatyn edi. Alaıda olar qarsylasynan 0:1 esebimen utylyp, jaǵdaıyn qıyndatyp aldy.
Germanııa quramasy osyǵan deıin tórt dúrkin álem chempıony atansa, Ispanııa 2010 jylǵy birinshilikte úzdik shyqqan edi.
Qos komandanyń joldary 25 ret toqaılasyp, 9-ynda Germanııa, 8-inde Ispanııa jeńgen. 8 márte teń túsken eken. Biraq osy ǵasyrda germanııalyqtar resmı kezdesýlerde Ispanııany jeńip kórmegen.
Bul joly birinshi taımda esep ashylmady. 7-mınýtta Danı Olmonyń soqqysyn Germanııa qaqpashysy Manýel Noıer qaıtaryp, dop qaqpa mańdaıshasyna tıip, asyp ketti.
Ekinshi kezeńde Ispanııa bapkeri Lýıs Enrıke 54-mınýtta Fernan Torrestiń ornyna Alvaro Moratany shyǵardy. Bul aýystyrý óz jemisin berdi. 62-mınýtta sol qanattan Jordı Albadan pas alǵan Alvaro Morata esep ashty – 1:0. 73-mınýtta ıspanııalyq qaqpashy Ýnaı Sımon Djamal Mýsıalanyń gol soǵýyna múmkindik bermedi. Degenmen 83-mınýtta ekinshi taımda alańǵa shyqqan Nıklas Fıýllkrýg Mýsıalanyń pasynan soń tarazy basyn teńestirdi – 1:1. Ekinshi taımda komandasynyń oıynyna jan kirgizgen Leroı Sane sońǵy sátte óz múmkindigin paıdalana almady.
Osylaısha, Ispanııa men Germanııa teń tarqasty – 1:1. Ispanııada tórt, Japonııa men Kosta-Rıkada úsh upaıdan bar. Bir ǵana upaıy bar Germanııa da pleı-off joldamasynan úmit úzgen joq.
Barlyq másele 1 jeltoqsan kúngi Japonııa – Ispanııa, Kosta-Rıka – Germanııa kezdesýlerinde sheshiledi.
Eske sala keteıik, budan buryn Kılıan Mbappeniń Frantsııany pleı-off kezeńine shyǵarǵanyn jazǵan bolatynbyz.
Sondaı-aq Marokko quramasy Belgııadan basym tústi.
Kanada quramasy álem chempıonatyndaǵy alǵashqy golyn soqty.
Horvatııa Kanadany iri eseppen utty.