Qatar-2022: Horvatııa Brazılııany jeńip, jartylaı fınalǵa joldama aldy
Álem chempıonatynyń 1/4 fınalyndaǵy alǵashqy kezdesý Horvatııa men Brazılııa quramalary arasynda ótti.
Dúbirli doda bastalar aldynda jankúıerler Brazılııany bas júldeden negizgi úmitker retinde qarastyryp keldi. Kileń tájirıbeli fýtbolshylardan jasaqtalǵan qurama toptyq kezeńde eki márte jeńiske jetip, bireýinde qarsylasyna ese jiberdi. Pleı-off satysynda Ońtústik Koreıany 4:1 esebimen súrindirdi.
Al 2018 jylǵy álem chempıonatynyń kúmis júldesine qol sozǵan Horvatııa ádemi oıyn órnegimen jankúıerdi qýanta almaı keledi. Toptyq kezeńde eki márte teń túsip, bireýinde ǵana jeńiske jetti. Al 1/8 fınalda Japonııany oıyn sońyndaǵy penaltı tebý arqyly qapy qaldyrdy.
Búgingi kezdesýde brazılııalyq fýtbolshylar shabýyl shebinde kóbirek boı kórsetti. Horvatııa quramasy negizinen qorǵanysqa kóńil bóldi. Birinshi kezeńde tablodaǵy esepke ózgeris engen joq.
Ekinshi kezeńde de oıyn osy baǵytta órbidi. Neımar bastaǵan fýtbolshylar horvatııalyq qorǵaýshylarǵa kóp jumys taýyp berdi.
Negizgi kezeńde 0:0 esebi tirkeldi. Oıyn overtaımǵa ulasty. Overtaımnyń 105-mınýtynda brazılııalyq shabýylshy Neımar mergendik tanytyp, óz quramasyn alǵa shyǵardy. Osylaısha ol ulttyq qurama sapynda gol slý jóninen áıgili Pelemen teńesti.
Al 117-mınýtta horvatııalyq Brýno Petkovıch tarazy basyn teńestirdi.
Osylaısha overtaımda 1:1 esebi tirkelip, jeńimpaz penaltı tebýden anyqtaldy. Bul joly Horvatııanyń joly bolyp, jartylaı fınalǵa joldama aldy.
Endi Horvatııa 13 jeltoqsanda jartylaı fınalda Nıderlandy men Argentına jubynyń jeńimpazymen sheberlik baıqasady.
Shırek fınaldaǵy Nıderlandy men Argentına kezdesýi elorda ýaqytymen 01:00-de «Qazaqstan» men «Qazsport» telearnalarynan tikeleı efırde kórsetiledi.
Sondaı-aq, 10 jeltoqsanda Marokko men Portýgalııa, Anglııa men Frantsııa quramalary kezdesedi.
Foto: championat.com