Qatar-2022: E tobynda eki joldama qaı quramalarǵa buıyrady
Atalǵan toptaǵy eki oıyn da elorda ýaqytymen 1:00-de bastalady.
Bul topta barlyq quramanyń jarysty jalǵastyrý múmkindigi bar. Eki oıynnan keıin Ispanııanyń - 4, Japonııa men Kosta-Rıkanyń - 3, Germanııanyń -1 upıy bar.
Japonııa men Ispanııa kezdesýi «Qazaqstan» telearnasynan tikeleı efırde kórsetiledi.
Oıyn el astanasy - Doha qalasyndaǵy 45857 jankúıerge arnalǵan «Halıfa Interneıshnl» stadıonynda ótkiziledi.
Bas tóreshi - Ońtústik Afrıka ókili Vıktor Gomes. Oǵan otandasy Zahele Sıvela men lesotolyq Sýrý Fatsoan kómektesedi. Qosalqy tóreshi - rýandalyq Salıma Mýkansanga.
FIFA reıtınginde Japonııa - 24, Ispanııa 7-orynda tur.
Eki qurama buǵan deıin eki márte kezdesti. 1968 jyly Olımpıada oıyndarynda 0:0 esebimen teń tússe, 2001 jyly joldastyq kezdesýde Ispanııa 1:0 esebimen jeńiske jetti.
Al atalǵan toptaǵy Kosta-Rıka men Germanııa kezdesýin jankúıerler «Qazsport» telearnasynan tamashalaýǵa bolady.
Oıyn El-haýr qalasyndaǵy 68895 jankúıerge arnalǵan «El-Baıt» stadıonynda ótkiziledi.
Bas tóreshi - frantsııalyq Stefanı Frappar. Ol erler arasyndaǵy fýtboldan álem chempıonatynda alǵash ret áıel tóreshi atanbaq.
Oǵan brazılııalyq Neýza Ines Bakk pen meksıkalyq Karen Hanett Dıas Medına kómekshilik jasaıdy. Qosalqy tóreshi - gondýrastyq Saıd Martınes.
FIFA reıtınginde Kosta-Rıka - 31, Germanııa 11 orynda tur.
Eki qurama buǵan deıin bir márte kezdesti. 2006 jyly álem chempıonaty toptyq kezeńinde Germanııa atalǵan qarsylasynan 4:2 esebimen basym tústi.
Aıta ketsek, buǵan deıin jarystyń 1/8 fınalyna Frantsııa, Avstralııa, Brazılııa, Portýgalııa, Nıderland, Senegal, Anglııa, AQSh, Argentına, Polsha quramalary joldama aldy.
Foto: LAURENCE GRIFFITHS/GETTY IMAGES