Qatar-2022: Argentına alǵashqy upaıyna qol jetkize ala ma
Alǵashqy kezdesý elorda ýaqytymen 19:00-de Polsha men Saýd Arabııasy quramalary arasynda bolady. Oıyn «Qazsport» telearnasynan tikeleı efırde kórsetiledi.
Kezdesý Er-Raııan qalasyndaǵy 44667 jankúıerge arnalǵan «Edıýkeıshn Sıtı» stadıonynda ótpek. Bas tóreshi -
brazılııalyq Vılton Sampaıo. Oǵan otandastary - Brýno Boshılııa men Brýno Pıres kómekshilik jasaıdy. Qosalqy tóreshi - perýlik Kevın Ortega.
Eki qurama buǵan deıin tórt márte sheberlik baıqasty. Barlyǵynda polshalyq fýtbolshylardyń mereıi ústem boldy.
Alǵashqy týrda Polsha Meksıkamen 0:0 esebimen teń oınasa, Saýd Arabııasy Argentınany 2:1 esebimen súrindirdi.
Kezdesýde polıak fýtbolshylary úshin jeńis óte qajet. Olaı bolmaǵan jaǵdaıda jarysty jalǵastyrý múmkindigi qıyndaı túsedi. Álem fýtbolynyń juldyzy Robert Levandovskı bastaǵan qurama sol senimdi aqtaýǵa barynsha kúsh salady. Al Saýd Arabııasy jeńisti joldy jalǵastyrýǵa tyrysady. Alǵashqy týrdaǵy jeńis tekten tekke kelmegenin kórsetpek.
Atalǵan toptaǵy Argentına men Meksıka kezdesýi «Qazaqstan», «Qazsport» telearnalarynan elorda ýaqytymen 01:00-de tikeleı efırde kórsetiledi.
Oıyn Lýsaıl qalasyndaǵy 88966 sııatyn «Lýsaıl Aıkonık» stadıonynda ótkiziledi.
Bas tóreshi - ıtalııalyq Danıele Orsato. Oǵan otandastary Chıro Karbone men Alessandro Djallatını kómekshilik jasaıdy. Qosalqy tóreshi - rýmynııalyq Ishtvan Kovach.
Eki qurama buǵan deıin 32 márte kezdesti. Onyń 16-da argentınalyq fýtbolshylar, 4-de Meksıka quramasy jeńiske jetse, qalǵany teń nátıjemen aıaqtaldy.
Eki qurama úshin de jeńis qajet. Argentına teń túsip nemese jeńilgen jaǵdaıda jarysty jalǵastyrý múmkindigin qıyndata túsedi. Meksıkalyqtar da upaı qoryn tolyqtyrýǵa tyrysatyny anyq.
Sondaı-aq, 25 qarashada A tobynda Senegal Qatardan basym tústi.
Al atalǵan toptaǵy Nıderland pen Ekvador quramalary teń tarqasty.
V tobynda Iran Ýelsti jeńse, Anglııa men AQSh quramalary teń oınady.