Qasymov sottalǵandardy teologııalyq saýyqtyrýdan ótkizetin boldy

ASTANA. QazAqparat - Úkimet basshysy Baqytjan Saǵyntaev Іshki ister mınıstri Qalmuhanbet Qasymovqa sottalǵandardy teologııalyq saýyqtyrýdan ótkizýdi tapsyrdy, dep habarlaıdy QazAqparat.

«Elbasynyń Joldaýdaǵy tapsyrmalaryna oraı, terrorızmmen kúres sharalaryn kúsheıtý kerek. Prezıdent qoǵamda radıkaldy qubylystarmen baılanysty qylmystarǵa «múlde tózbeý» prıntsıpin qalyptastyrýdy tapsyrdy. Sondyqtan, Din isteri jáne azamattyq qoǵam mınıstrligine dinı ekstremızmdi eskertý jumystaryn nasıhattaýdy jáne qoǵamda únemi, úzilissiz túsindirý sharalaryn júrgizýdi tapsyramyn»,-dedi Saǵyntaev.

Premer-mınıstr sondaı-aq, terrorızmniń aldyn alýda qamaýdaǵy adamdarmen de júıeli túrde jumys isteýdiń mańyzdylyǵyn atap ótti.

«Qalmuhanbet Nurmuhanbetuly (Іshki ister mınıstri - Qalmuhanbet Qasymov) qamaý mekemelerinde sottalǵan azamattardy teologııalyq saýyqtyrýdan ótkizý kerek»,-dedi Іshki ister mınıstrine tapsyrma bergen Úkimet basshysy.