Qasymbek «Batys Eýropa-Batys Qytaı» kólik dálizindegi kemshilikterdi atady

ASTANA. QazAqparat - QR Investıtsııalar jáne damý mınıstri Jeńis Qasymbek «Batys Eýropa-Batys Qytaı» halyqaralyq kólik dálizin salý kezindegi anyqtalǵan kemshilikterdi aıtyp berdi, dep habarlaıdy QazAqparat. 

«Tóselgen jol ýchaskelerinde anyqtalǵan kemshilikter boıynsha keıinge úlgi bolarlyqtaı 3-4 oqıǵa oryn aldy. Onyń ishinde «Batys Eýropa-Batys Qytaı» dálizinde bir jaǵdaı Jambyl oblysynda, al ekinshisi Ońtústik Qazaqstan oblysynda anyqtaldy»,-dep toqtaldy mınıstr Májilistegi Úkimet saǵaty barasynda.

Onyń atap ótýinshe, Jambyl oblysynda jol ýchaskesi betki qabatynyń qabyrshaqtanýy baıqaldy.

«Al ekinshisinde koreılik kompanııanyń mamandary ózderi joldaǵy kemshilikti anyqtady. Osy oraıda betonnyń astyndaǵy armatýranyń durys qoıylmaǵandyǵy belgili boldy. Kompanııa óz tarapynan bul kemshilikterdi túzetti. Jalpy, osy kelisimsharttar boıynsha kepildemelik merzim bar, ıaǵnı halyqaralyq sharttar turǵysynda 2 jyl eskerilgen. Eger de eki jyldyń ishinde jolda aqaýlar baıqalsa, merdiger kompanııa óziniń esebinen joldy qalpyna keltirýi tıis. Ol úshin biz atalǵan merzimde sharttyń qunynan 5 paıyzdyq banktik kepildemeni saqtap turamyz. Bul aıtarlyqtaı qatań shara jáne osy tájirıbeni halyqaralyq qarjylyq ınstıtýttar usynǵan bolatyn»,-dedi vedomstvo basshysy.