Qasym-Jomart Toqaevtyń Pavlodar oblysyna saparynan vıdeo jarııalandy
Búgin Q.Toqaev jumys saparymen Pavlodar oblysyna bardy.
Memleket basshysy Ekibastuzdaǵy jylý elektr ortalyǵynda júrgizilip jatqan jóndeý jumystarymen tanysty.
Premer-Mınıstrdiń birinshi orynbasary Roman Sklıar Ekibastuz qalasyndaǵy jylýmen qamtý júıesin jańǵyrtýǵa Úkimet tarapynan kórsetilgen qoldaý sharalary týraly baıandady.
Prezıdent JEO jaǵdaıymen tanysqan soń jergilikti turǵyndarmen áńgimelesti. Kópbalaly ana Aıana Smaǵulova qalada balalardyń bos ýaqytyn tıimdi ótkizip, olardyń jan-jaqty damýyna arnalǵan Shyǵarmashylyq úıin salyp berýdi surady. Al qalalyq Ardagerler keńesiniń tóraǵasy Samat Ramazanov jylý júıesindegi jóndeý jumystaryn jeke baqylaýyna alýdy jáne qalalyq «Shahter» saıabaǵyn jóndeýdi ótindi.
Keıin Qasym-Jomart Toqaev Pavlodar oblysy kásiporyndarynyń ónimderi qoıylǵan kórmeni aralap kórdi. Kórmege tamaq jáne qaıta óńdeý, aýyl sharýashylyǵy sondaı-aq metallýrgııa, mashına jasaý, qurylys ındýstrııasy, munaı hımııasy jáne farmatsevtıka salalaryndaǵy kásiporyndar qatysty.
Oblys ákimi Asaıyn Baıhanovtyń baıandaýynsha, birinshi jartyjyldyqta óńirge 344 mıllıard teńge ınvestıtsııa tartylǵan. Bul byltyrǵy kezeńmen salystyrǵanda 30 paıyzǵa kóp. Budan bólek, Prezıdentke óńirdegi elektroenergetıkalyq kásiporyndardyń tehnıkalyq jaǵdaıy týraly baıandaldy. Oblys ákimi GRES-1 jáne GRES-2 energobloktaryn, sondaı-aq Aqsý qalasyndaǵy №7 elektrostantsııany jańǵyrtý jumystary 2024 jyly aıaqtalatynyn aıtty.
Sondaı-aq Prezıdentke Poly Metal International plc halyqaralyq kompanııasy qolǵa alǵan iri jobanyń júzege asyrylý barysy jóninde málimet berildi.
Joba aıasynda quramynda altyny bar 300 myń tonna kontsentratty qaıta óńdep, odan 15 tonna altyn alý josparlanǵan. Óndiriske quıylatyn ınvestıtsııa kólemi – 347 mıllıard teńge.
Keıin Q.Toqaev qurylys materıaldaryn shyǵarýmen jáne túrli maqsatta qoldanylatyn nysandar salýmen aınalysatyn «ZENITH» zaýytyna bardy.
Odan ári turǵyndarǵa oftalmologııalyq qyzmetter kórsetetin klınıkaǵa, Pavlodar aqparattyq tehnologııalar kolledjiniń negizinde qurylǵan aımaqtyq IT-Hub-qa bardy.
Óńirdiń kreatıvti jastarymen kezdesýinde Memleket basshysyna balanyń aqyl-oı qabiletin damytatyn Ibars-kids mobıldik oıyny tanystyryldy.