Qasym-Jomart Toqaevtyń «Abaı jáne HHІ ǵasyrdaǵy Qazaqstan» maqalasy ázerbaıjan tilinde jaryq kórdi
Ázerbaıjannyń resmı bas basylymy «Respýblıka» gazeti QR Prezıdenti Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasyn ázerbaıjan tilinde jarııalady. Ony aýdarǵan tanymal ázerbaıjandyq jýrnalıst Aıda Eıvazova maqalany Facebook -tegi paraqshasynda jurtshylyq nazaryna usyndy.
«Qazaqstan Prezıdentiniń maqalasyn ázerbaıjan tiline aýdardym jáne ol joǵary deńgeıde tárjimalandy dep oılaımyn. Abaı shyǵarmalary – búkil túrki jurtynyń murasy. Aýdarma biraz qıyndyq ta týdyrdy. Ádette erkin aýdarma jasaıtyn edim. Biraq, maqalada qazaq tilindegi kóne sózder jıi kezdesedi eken. Al ol sózderdiń elektrondy aýdarmashyda naqty maǵynasy joq. Sondyqtan ázerbaıjandyqtar úshin de, Qazaqstandaǵy oqyrmandar úshin de jeńil ári túsinikti tilde aýdarýǵa tyrystym»,- dedi Aıda Eıvazova QazAqparat tilshisine bergen suhbatynda.
Sonymen qatar ol qazirgi ýaqytta Abaıdyń qara sózderin aýdarýǵa kiriskenin aıtady.
«Osydan 10 kún buryn Abaıdyń qara sózderin aýdarýǵa kirisken edim. Qazir kún saıyn tańerteń modern.az oqyrmandaryna Abaıdyń qara sózderin tanystyryp otyramyz. Qazaqtyń uly aqynynyń bul murasyn aqpan aıynyń sońyna deıin aıaqtaý oıymda bar. Sodan keıin Halyqaralyq túrki akademııasy kitap qylyp basyp shyǵarady. Abaı sózderi Quran hadısterin, ázerbaıjan satırıkteri Mırza Alekper Sabır, Saıd Azım Shırvanıdi eske túsiredi. Menińshe, Abaı murasy – babalar sózi», - dedi Ázerbaıjan jýrnalısi.
Eske sala ketsek, «Egemen Qazaqstan» gazetiniń 9 qańtardaǵy sanynda QR Prezıdenti Qasym-Jomart Toqaevtyń «Abaı jáne HHІ ǵasyrdaǵy Qazaqstan» atty maqalasy jarııalanǵan bolatyn.