Qasym-Jomart Toqaevty qoldaý boıynsha respýblıkalyq qoǵamdyq qozǵalys quryldy
Qoǵamdyq qozǵalysty qurý jónindegi bastamany Mereke Qulkenov, Raıymbek Batalov, Aqberen Elgezek, Sergeı Ponomarev, Beknur Qısyqov, Dáýren Qýat, Dáýletkereı Kápuly, Ádil Ahmetov, Nazgúl Qarabalına, Marat Shıbutov jáne ózge de belgili qoǵam, saıasat, mádenıet jáne sport qaıratkerleri, zııaly qaýym men bıznes-qoǵamdastyq ókilderi, qoǵamdyq uıymdardyń kóshbasshylary kótergen.
«Jalpy, 2019 jyly bastalǵan Prezıdent reformalary kezeń-kezeńimen júzege asyp keledi. «Qaıǵyly qańtar oqıǵasynan» keıin qoǵamdy demokratııalandyrý men lıberaldandyrý protsesteri qarqyndy júrýde. Sondyqtan biz azamattyq qoǵam osy ózgeristerdiń bel ortasynan tabylýy qajet dep sanaımyz. Bizdiń qozǵalys úgit-nasıhat úshin emes, protsesterge qatysý úshin qurylǵan. Biz qazir reformalardy qoldap, osy mańyzdy kezeńdi sońyna deıin jetkizýimiz kerek», - dedi Qazaqstan Jazýshylar odaǵy tóraǵasynyń birinshi orynbasary Aqberen Elgezek.
Sondaı-aq ol Prezıdentti qoldaıtyn qoǵamdyq qozǵalystyń zańdy uıym emes ekenin aıtty.
«Qoǵamdyq qozǵalys eshqandaı zańdy uıym retinde tirkelgen joq. Búgingi jıynǵa qatysýshy azamattar respýblıkanyń túkpir-túkpirinen jınaldy. Aldaǵy ýaqytta qatarymyzǵa turaqtylyq pen jarqyn bolashaqty qoldaıtyn basqa da azamattar qosylady dep senemiz. Maqsatymyz týǵan jerimizdi kórkeıtý, elimizdiń keleshegin jarqyn etý bolǵan soń, irgeli ózgeristi bastaǵan Memleket basshysy Qasym-Jomart Toqaevty bárimiz qoldaýymyz kerek», - dedi aqyn.
Sonymen qatar atalmysh qozǵalys ókilderi qoǵamǵa úndeý jarııalady.
«Biz ıdeıanyń aınalasyna toptasýǵa shaqyramyz. Elimizdi saıası jáne ekonomıkalyq turǵydan reformalaý – Jańa Qazaqstanǵa jetkizetin jol. Biz reformany jaqtaýshylardyń qanshalyqty kóp ekenin kórsetý úshin birigeıik dep otyrmyz. Al bizdiń óte kóp ekenimiz anyq. Árıne, osy arqyly kimniń alǵa jyljyǵysy kelmeıtinin de, kimniń ishteı ne ashyq túrde eski Qazaqstandy ańsaıtynyn da bilemiz. Tańdaý jasar sát týdy»,- dedi qoǵam ókilderi úndeýde.