Qasym-Jomart Toqaev jarylystardyń sebepterin muqııat zertteýdi talap etti

NUR-SULTAN. QazAqparat - Memleket basshysy Qasym-Jomart Toqaev Arystaǵy jaǵdaıǵa baılanysty qurylǵan jedel shtabtyń otyrysyn ótkizdi. Bul jaıynda QR Prezıdentiniń baspasóz hatshysy Berik Ýálı Facebook-tegi paraqshasynda jazdy, dep habarlaıdy QazAqparat tilshisi.

«Qazaqstan Prezıdenti Arys qalasyndaǵy jaǵdaımen tanysý úshin Túrkistan oblysyna keldi. Memleket basshysy qarý-jaraq qoımasyndaǵy jarylystardyń zardaptaryn qalpyna keltirý jónindegi jedel shtabtyń otyrysyn ótkizdi. Oblys basshysy Ómirzaq Shókeev Prezıdent Qasym-Jomart Toqaevqa oqıǵa ornyndaǵy jaǵdaı men atqarylyp jatqan is-sharalar týraly baıandady. Memleket basshysy eń aldymen qaıtys bolǵan azamattyń jaqyndary men týystaryna kóńil aıtty», - dep atap ótedi Berik Ýálı.

Onyń atap ótýinshe, Prezıdent baspanasyz qalǵan azamattardy jedel ornalastyrýdy qamtamasyz etý úshin shuǵyl sharalar qabyldap, zardap shekkenderge qajetti jan-jaqty kómek, sonyń ishinde medıtsınalyq járdem kórsetýdi tapsyrdy. Memleket basshysy memlekettik materıaldyq qordyń esebinen qalanyń qalypty tirshiligin qamtamasyz etý úshin qajetti taýarlar men materıaldyq qundylyqtardy berýdi tapsyrdy.

«Úkimet pen oblys ákimdigin qalpyna keltirý jumystarynyń qunyn eseptep shyǵarýdy jáne turǵyn úılerdi, ınjenerlik jelilerdi, áleýmettik jáne basqa da ınfraqurylymdy qalpyna keltirý úshin Úkimettiń qorynan qajetti qarajattyń bólinýin qamtamasyz etýdi tapsyrdy. Qasym-Jomart Toqaev oqıǵa ornynda qutqarý jáne qalpyna keltirý jumystary barysynda vedomstvoaralyq ózara júıeli is-qımyldy uıymdastyrýdy, sondaı-aq, jarylystardyń sebepterin muqııat zertteýdi talap etti», - dedi ol.