Qasym-Jomart Toqaev: Ýkraınamen bizdi dástúrli dostyq pen yntymaqtastyq baılanystyrady

BERLIN. QazAqparat – Qazaqstan men Ýkraınany dástúrli dostyq jáne yntymaqtastyq baılanystyrady. QR Prezıdenti Qasym-Jomart Toqaev GFR Kantsleri Angela Merkelmen kezdesý qorytyndysy boıynsha ótken baspasóz máslıhatynda osylaı málim etti, dep habarlaıdy «QazAqparat» HAA menshikti tilshisi.

«Tuńǵysh Prezıdentimiz Ýkraına máselesin Qazaqstan aýmaǵynda retteýge qatysty óziniń izgi oıyn bildirdi. Degenmen biz Ýkraına máselesi, eń aldymen, Normand formatynda sheshilýi tıis dep oılaımyz», - dedi Memleket basshysy reseılik-ýkraındyq sammıtti uıymdastyrýǵa araǵaıyndyq jasaý múmkindigi týraly suraqqa jaýap bere otyryp.

Germanııa, Reseı, Ýkraına, Frantsııanyń memleket basshylarynyń Ýkraına shyǵysyndaǵy jaǵdaıdy retteý jónindegi kezdesýi Parıjde 9 jeltoqsanda ótedi.

«9 jeltoqsan kúni Parıjde ótetin Normand formatyndaǵy kezdesýge tabys tileımiz. Qazaqstan men Ýkraınanyń arasynda dástúrli dostyq pen yntymaqtastyqtyń berik tini burynnan qalyptasqan. Ýkraına halqy beıbit te berekeli ómir súrýge laıyq dep esepteımiz», - dedi Qazaqstan Prezıdenti.

Avtory Tımýr Dúısekeev