Qasym-Jomart Toqaev «Ýahat ál-Karama» memorıaldy keshenine bardy
Memleket basshysy Qasym-Jomart Toqaev Birikken Arab Ámirlikterine resmı sapary barysynda Abý Dabı qalasyndaǵy «Ýahat ál-Karama» memorıaldy keshenine bardy.
Qasym-Jomart Toqaev 1971 jyldan beri soǵysta nemese qyzmet babynda qaza bolǵan sarbazdarǵa, quqyq qorǵaý qyzmetkerlerine, dıplomattar men Birikken Arab Ámirlikteriniń azamattaryna arnap soǵylǵan, ataýy – «Namys oazısi» degen maǵyna beretin keshendi aralap kórdi. Qurban bolǵandardyń rýhyna taǵzym etip, gúl shoǵyn qoıdy.
Prezıdent memorıal keshenindegi Qurmetti qonaqtar qoltańba qaldyratyn kitapqa «Syn saǵatynda qaharmandyq tanytqan sańlaqtar memorıaly bolashaq urpaqqa beıbit ómirdiń qundylyǵyn dáripteıdi. Óz Otanynyń múddesi jolynda qasıetti boryshyn ótep, qurban bolǵan perzentter rýhyna taǵzym etemin. Baýyrlas Ámirlikter halqyna qut-bereke men mol yrys tileımin», – degen tilegin qaldyrdy.