Qasym-Jomart Toqaev Twitter-degi paraqshasyn ózi júrgizedi - Berik Ýálı

NUR-SULTAN. QazAqparat – Memleket basshysy Qasym-Jomart Toqaev sózdiń emes istiń adamy. Mundaı pikirdi «Habar 24» telearnasynyń «Suqbat» baǵdarlamasynda QR Prezıdentiniń baspasóz hatshysy Berik Ýálı aıtty, dep habarlaıdy QazAqparat tilshisi.

Berik Ýálı Memleket basshysy Twitter-degi paraqshasyn ózi júrgizetindigin basa aıtty.

«Kez kelgen memlekettik laýazymdy tulǵanyń áleýmettik jelidegi paraqshasyn kómekshileri nemese baspasóz qyzmeti júrgizedi degen qasań túsinik bar. Joq, Memleket basshysy kez kelgen tvıtti ózi jazyp, qadaǵalap halyqqa usynyp otyr desem, qatelespeımin», - dedi QR Prezıdentiniń baspasóz hatshysy.

Onyń aıtýynsha, memlekettik rámizderdi paıdalanýǵa qatysty qoǵamda úlken pikirtalas týyndaǵan kezde Prezıdent arnaıy tvıt jazyp, rámizderdi paıdalaný qaǵıdattaryn qaıta qaraýǵa tapsyrma berdi.

«Ony der kezinde depýtattar ilip alyp, memlekettik rámizderdiń qoldanys aıasyn keńeıtti», - dedi ol.