Qasym-Jomart Toqaev TMYK basshylaryna: Betpe-bet júzdesemiz dep senemin

NUR-SULTAN. QazAqparat – QR Prezıdenti Qasym-Jomart Toqaev Túrki tildes memleketterdiń yntymaqtastyq keńesiniń beıresmı sammıti nelikten onlaın ótip jatqanyn túsindirdi, dep habarlaıdy QazAqparat tilshisi.

«Bul basqosýdy bárimiz úshin qasıetti Túrkistanda uıymdastyrýdy josparlaǵan edik. Alaıda, pandemııaǵa baılanysty kúrdeli ahýalǵa oraı biz sammıtti onlaın formatta ótkizýdi jón kórdik. Іndettiń beti qaıtqan soń burynǵydaı betpe-bet júzdesemiz dep senemin. Osy múmkindikti paıdalana otyryp, barshańyzdy Naýryz meıramymen taǵy da quttyqtaımyn», - dedi beıresmı otyrysty ashqan QR Prezıdenti.

Memleket basshysy Naýryz kúlli túrki jurtynyń tól merekesi ekendigin basa aıtty.

«Baýyrlas elderge baq-bereke tileımin. Endi is-sharany uıymdastyrýshy retinde Túrki keńesiniń beıresmı sammıtin ashyq dep jarııalaımyn», - dedi Qasym-Jomart Toqaev.

Beıresmı sammıt barysynda alǵashqy sóz túrki dúnıesiniń tutastyǵyna uıytqy bolǵan tulǵa Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevqa berildi. Ári qaraı Memleket basshylary aǵylshyn álipbıiniń reti boıynsha sóz sóılep, Túrki keńesiniń bas hatshysy baıandama jasaıtyn bolady.

Sammıt sońynda túrki elderiniń mádenı qundylyqtaryna jáne keńestiń mártebesine qatysty qorytyndy deklaratsııa qabyldanady.