Qasym-Jomart Toqaev tennısshi Rybakınaǵa oramal men saǵat syılady

ASTANA. QazAqparat – Qazaqstannyń - birinshi, álemniń jetinshi raketkasy Elena Rybakına Memleket basshysymen kezdesý sátinen keıingi áserimen bólisti, dep habarlaıdy QazAqparat tilshisi.

«Kezdesý jaqsy ótti. Árıne, tańerteńnen qobaljydym. Jalpy bári oıdaǵydaı ótti. Prezıdentpen óz josparlarymmen bólisip, aldaǵy matchtar týraly sóılestim. Memleket basshysy meni tennıstegi nátıjelerimmen quttyqtady. Prezıdentten syılyq aldym, saǵat jáne oramal», - dedi Elena Rybakına elordada tennısten «Bıllı Djın Kıng» kýbogine oraı ótken baspasóz máslıhatynda.

Aıta keteıik, búgin Memleket basshysy Elena Rybakınany qabyldady. Kezdesý barysynda tennısshi Prezıdentke Wimbledon-2022 kitabyn syıǵa tartqanyn jazǵan edik.

Rybakına qazaqstandyq jankúıerlerdi Bıllı Djın Kıng kýbogynyń irikteý matchyn tamashalaýǵa shaqyrdy.

Eske salsaq, elordada 14-15 sáýir kúnderi tennısten Bıllı Djın Kıng kýboginiń (komandalyq álem chempıonaty) irikteý kezeńiniń aıasynda Polshamen match ótedi.