Qasym-Jomart Toqaev Táýelsizdiktiń tórtinshi onjyldyǵyndaǵy mejelerdi atady

NUR-SULTAN. QazAqparat – QR Táýelsizdiginiń 30 jyldyǵyna arnalǵan saltanatty jıynda Prezıdent Qasym-Jomart Toqaev Táýelsizdiktiń tórtinshi onjyldyǵy qandaı mindetter júkteıtinin aıtty, dep habarlaıdy QazAqparat.

«Tarıhı ýaqyt ólshemimen qaraǵanda 30 jyl degen – qas-qaǵym sát. Al, ótken oqıǵalar turǵysynan baǵalasaq, ǵasyrlarǵa tatıtyn merzim. Qazaqstan halqy úshin bul – azattyq jylnamasynyń tutas dáýiri. Jarqyn bolashaǵymyzǵa jol salǵan uly jetistikter kezeńi.

Endi Táýelsizdiktiń tórtinshi onjyldyǵyna qadam basqaly turmyz. Bul kezeń bizge jańa mindetter júkteıdi. Memlekettigimizdi odan ári nyǵaıtyp, halqymyzdyń ál-aýqatyn arttyra túsýimiz kerek. Sondyqtan, barlyq saladaǵy reformany jalǵastyra beremiz», - dedi Prezıdent.

Sondaı-aq, Qasym-Jomart Toqaev endigi býynnyń mindeti Táýelsizdikti qorǵap, nyǵaıtý ekenin eske saldy.

«Eń bastysy, beıbit ómirdi, tynyshtyq pen turaqtylyqty saqtaı bilýimiz qajet. Sonda azamattarymyz Táýelsizdiktiń ıgiligin árdaıym sezinetin bolady. Bizdiń maqsatymyz – osy.

Babalarymyz ǵasyrlar boıy Táýelsizdikke jetý úshin kúresse, endigi urpaq Táýelsizdikti qorǵap, nyǵaıtý úshin kúresedi. Biz búgingi eldik isterdi jastarǵa amanattaımyz.

Qazirgi aýqymdy jumystyń bári jarqyn bolashaq úshin jasalýda. Egemendik kezeńinde oıy azat, rýhy bıik Táýelsizdik perzentteri ósip-jetildi. Shyn máninde, olardyń áleýeti óte zor, múmkindikteri orasan. Óskeleń urpaq aǵa býynnyń tájirıbesin paıdalanyp, úmitin aqtaıdy dep senemin», - dedi Memleket basshysy.