Qasym-Jomart Toqaev shtaby Syr óńirinde birneshe kezdesý ótkizdi

QYZYLORDA. QazAqparat - Prezıdenttikke kandıdat Qasym-Jomart Toqaevtyń qoǵamdyq shtaby Syr boıy turǵyndarymen kezdesti, dep habarlaıdy QazAqparat shtabtyń baspasóz qyzmetine silteme jasap.

Qasym-Jomart Toqaevtyń Qyzylorda oblysyndaǵy senimdi ókilderi Nurmurat Ermanov pen Jaǵyppar Qarabala paralımpıadashylarymen kezdesti. Olar sportshylarǵa kandıdattyń saılaýaldy baǵdarlamasyn túsindirdi.

Syr óńirinde byltyr alǵash ret múgedekterge arnalǵan sport klýby quryldy. 300-den astam paralımpıadashy sporttyń 15 túrimen turaqty túrde shuǵyldanady. Jetken jetistikteri de az emes. Byltyr Álem, Azııa jáne halyqaralyq básekelerde 20-ǵa jýyq júldeni ıelendi. Bıyl el birinshiliginde qorjynǵa 14 júlde saldy.

Sonymen qatar, shtab ókilderi Jańaqorǵan aýdanyndaǵy kúkirt qyshqyly zaýytynyń ujymymen de kezdesti.

Kúkirt qyshqylyn óndiretin «SKZ-U» JShS Údemeli ındýstrıaldy-ınnovatsııalyq damý baǵdarlamasy aıasynda ashylǵan. Zaýyttyń qýaty kúnine - 1500 tonna, jylyna - 500 myń tonna. Kásiporyn 300-den astam adamdy jumyspen qamtyp otyr. Ónim óndirýde qaldyqsyz jumys isteıdi. Ereksheligi - ekologııalyq taza ónim shyǵarady.

Prezıdenttikke kandıdat Qasym-Jomart Toqaevtyń senimdi ókilderi eńbek ujymyna saılaýaldy baǵdarlamasyn túsindirip, saılaýǵa bir kisideı qatysyp, daýys berýge shaqyrdy.

Kezdesý barysynda jınalǵandar erkin pikir almasyp, senimdi ókilder jumysshylardy tolǵandyrǵan suraqtarǵa jaýap berdi.