Qasym-Jomart Toqaev: Shetelde bizdiń jetistikterimizdi kóre almaıtyn adamdar az emes

SEMEI. QazAqparat - Memleket basshysynyń paıymynsha, qazirgi qoǵamda adamdardyń bir-birine degen qurmeti men senimi azaıyp bara jatyr. Bul – óte qaýipti. Bul týraly ol Abaı oblysy jurtshylyǵymen kezdesýde aıtty, dep jazdy QazAqparat.

«Qatigezdik pen senimsizdik, nemquraılylyq, enjarlyq – halyqty jarǵa jyǵatyn jaǵymsyz ádetter. Biz el bolamyz desek, eń aldymen, jastardyń boıyna adamgershilik qasıetterdi sińirýimiz kerek. Sondaı-aq, ózara tilektestik pen baýyrmaldyqty árdaıym dáripteýimiz kerek. Muny Abaıdan artyq aıtqan eshkim joq. Uly oıshyldyń «Birińdi qazaq biriń dos, kórmeseń istiń bári bos» degen ósıetin umytpaıyq, aǵaıyn!» - dedi Qasym-Jomart Keemeluly.

Prezıdent elimizde jaýapkershilik ıdeologııasy ornyǵýǵa tıis ekenin atap ótti. Álemdegi ahýal asa kúrdeli bolyp ketti. Osyndaı jaǵdaıda búkil ult bolyp uıysyp, birigýimiz kerek.

«Árbir saıasatker, qoǵam qaıratkeri, jýrnalıst, bloger nemese jalpy azamattar sózi men áreketiniń jaýapkershiligin sezinýge tıis. Qazir ár isimiz memleket múddesine saı bolýy qajet. Bizdiń Qazaqstannan basqa Otanymyz joq.

Ókinishke qaraı, ashyǵyn aıtý kerek, shetelde bizdiń jetistikterimizdi kóre almaıtyn adamdar az emes. Olar, tipti, bizdiń elimizge aqparattyq shabýyl da uıymdastyrady. Onyń bárin kórip otyrmyz. Mine, biz elge qater tóndiretin osyndaı teris úrdisterdiń de bar ekenin umytpaýymyz kerek», - dedi Memleket basshysy abaılyqtarǵa.

1 11:41

Prezıdent: «Eń basty maqsat – memlekettiń múddesi. Otanymyzdy órkendetýge búkil qoǵam bolyp jumylýymyz kerek. Aımaqtardy damytýǵa memleket qana emes, bıznes ókilderi de atsalysýy qajet. Sondyqtan, men osy óńirden shyqqan isker azamattardy Abaı oblysyn birge kórkeıtýge shaqyramyn»

Foto : t.me/bort_01